Read Gangte SAM 53 Bible Online

SAM 53 - Gangte bible

SAM 53

¹Mingawl chun a lungthim in, “Pathien a um puoi,” a ti seka. A sie zo u a, thil gilo tenum tak a hih sek u a; Kuomah thilpha hih himhim a um puou.

²Hethiem a Pathien hawl mawngmawng a um um tih he ding in, Pathien in van a pat in mihiem chate hi a zuk en suk a.

³Abawn un a pukmang zo vek tau a; buok takin a um chiet tau a, Kuomah thilpha hih himhim a um puou, khatchale a um hiel puou.

⁴Thil hihkhielte chun hetna mawngmawng neilo ahiu em? Ka mite chuh chângthâk bangin a ne zo kêi u a, Pathien lah a sam kha ngei puou a.

⁵Lauhna himhim um lohna achun lauh atih in a lau u a, zie tawbang chun kuomah a lau kha puou hi. Pathien in pathien kihchalote guh chuh thehzak ding ahi; Pathien in amau haw chuh a paih thak ziekin na suzahhuoi ta a.

⁶Aw Israel hukdampa chuh Zion apat in hung pawt ta maizen le chu aw! Pathien in a mite chuh a vangsak kit phat leh, Jakob chuh lawp intin, Israel chuh kipâk ta’n a.