Read Gangte SAM 54 Bible Online

SAM 54 - Gangte bible

SAM 54

¹Aw Pathien, na min in ei hukdam inla, Na hatna chun vai ei hawm sak in.

²Aw Pathien, ka pauchamna hi ngaitha’n la; Ka kama thu pawt haw hi ana ngaitha’n.

³Malzin haw chun ei kisuol pih ta ngâl u a, Mi ngawngtawih te chu ei do dingin a hung kipan u a: mi ningkhelte chun ka hinna hi sukmang dingin a hawl u a, Pathien zahna a nei puou hi. Selah.

⁴Himahleh, Pathien chuh ei panpihpa ahi a; LALPA chun ka hinna a tuzing a.

⁵Amah chun ka melmate gitlohna chu din ina; Nangin a mau haw chuh na thutak na ziekin sumang in.

⁶Keimah deihlam a thillat in na kawmah kithawi ing ka ting, Aw LALPA, na min chuh pakcha’ng ka, a pha ngâla.

⁷Ka lungkhamna chengcheng apat nei hukdawk ta ngâla; Ei dote chunga ka guolzawhna chuh ka mit in a mu ta a.