Read Gangte SAM 55 Bible Online

SAM 55 - Gangte bible

SAM 55

¹Aw ka Pathien, ka pauchamna hi ana ngaitha’n la; Lungsiet ka ngetna ahin kisel ki’n.

²Ei ngaitha’n la, ei dâwng in: Ka lungkham ziekin ka kivat vat a, ka khuoisa sek hi.

³Ei dote husa ziek poh in; Mi nunsiete nuoisieh na ziekin; Amau chun ka chungah buoina a bawl u a, Lungnat na’n ei hih gimthei ngâl u a.

⁴Ka sunga hin ka lunggil a lungkham mah mah a; Thihna tizatumna haw chun ei delh khum u a.

⁵Lauhna leh kilinna’n ei bawh a, Lauhna chun ei khuh zo ta a.

⁶Tichun, “Aw, vakhu guola tha nei hi leng aw! Khutichun, leng mang ing ka ting, thamuong takin um ing ka. Selah

⁷Ahi, gamla tak ah vak viel ing ka ting, Gamthip ah um ing ka ting, Selah

⁸Huihpi leh guohpi hattak hi kisel mang san ding hi veng,” ka ti a.

⁹Aw LALPA a thil guon u chu hihsie’n la, a lei u chuh subuoi in: Khawpi achun kipawngbawlna leh kiphinna ka mu ngâla.

¹⁰A sun a zan in khawpi kulh bâng chu a kimvel a kimvel u a; A sunga chun gitlohna leh buoina a um behlap a.

¹¹A sunga chun nunsietna a um a; Nuoisiehna leh lepbawlna chun a khawlai u chu a pawtsan kha puoi.

¹²Ei gensie pên chuh melma ahi puoh ngâla; Hile chuh thuok thei zaw ding hi veng, Ka chunga kiletsak chuh ei mudah le ei puoi; Hile chuh kisel mangsan ding hi veng.

¹³Himahleh, nang, ka kibatpih, Ka guol, ka kithuguolpih na hi nalai set a.

¹⁴Amah chuh nuomsa taka ka na kipawlpih sek, Mipi laka Pathien ho ina I lên sek khah.

¹⁵Thihna a chung u ah hung tung hen la, Sheol achun a hing in chieh suk u hen.

¹⁶Ken vang chuh chuh Pathien sam ing ka ting; Tichun LALPA’n ei hukdam ina.

¹⁷Nitâk leh zingkal leh sun inle ka lungdawn thu gen in thum ing ka ting; Tichun, a ma’n ka aw ngaitha’n a.

¹⁸Ka chunga kidona lak achun ka hinna hi thamuong takin a humbit in tin: Ei dote chuh a tam ngâl u a.

¹⁹Pathien, malai apat lalchutphah a chu, Ngaitha’n tin, amau haw suniem ina, Selah. Lamdanna nei khalo, Pathien lauh dân thiem ngeilo mite chuh.

²⁰Amah tawh kicham te chung achun khut a tha ta a: A thugawlh chuh a subuok ta a.

²¹A kam chuh nawituikhal bangin a nâl a, Himahleh, kidona lungthim a pu zing u a; a thugen u chuh sathau sangin a nâl zaw a, himahleh, chemzâm zuk dawk sa ahi ngâla.

²²Na puokgik chuh LALPA chungah nga’n la, tichun, ama’n hun hih hât ina. Mi diktat chuh bangtik lai inle hih lîng phal puo’n a.

²³Himahleh, Aw Pathien, nangin amau haw chuh beihmang na kawkhuk achun chieh suk sak inla: Thisan suoh hât haw leh milepbawl nuom haw chu a dam ding chan uh kimkhat le dam zo puo’n au; Kei vang chun nang hun gingcha’ng ka.