Read Gangte SAM 57 Bible Online

SAM 57 - Gangte bible

SAM 57

¹Aw Pathien, ei lungsiet in, ei lungsiet in; Ka hinna hi nangmah a chun a hung puklut ngâl a, Ahi, na thanuoi chuh hun chuh ing ka. Vangsietna hi a kithiel masang sieh in.

²Pathien chungnung pên chuh uou ing ka; Pathien bangkim ei hih sak pên chuh.

³Ei valh zawh guo pa chun ei gensiet hun leh Pathien in a lungsietna leh a thutak chuh hun sawldawk in tin ei hukdam ina. Selah.

⁴Ka hinna hi sakeibaknei lak ah a um a; Mi meia halkang lak ah ka kuol a, Mihiem chate laka chun a hate chu tiengcha leh thalte ahi a. A lei u chuh chemzâm hiem tak ahi.

⁵Aw Pathien nang chuh van chung akhun limbawl in hung um inla, Na lopina chuh leichung chengcheng ahin hung um hen.

⁶Ka keng awkna dingin lên a zak u a; Ka hinna hi a khuntha a; Ka lampi ah kawkhuk a lai u a, Amau haw mah mah a lai tak ah a kielut u a. Selah

⁷Ka lunggil hi a det hi, aw Pathien ka lunggil hi a det hi; La sang ka ting ahi, pahchakna la sa’ng ka ting.

⁸Ka lopina halh in, pêkgit leh kingkang te haw halh un: Kei chuh zingpi takin halh ing ka.

⁹Aw LALPA, micheng lak ah na kawmah kipahthu gen ing ka; Nam cheng lak ah nangmah pakcha’n la sa’ng ka.

¹⁰Na zaidawhna chuh van suhiel in a nasa ngâla; Na ginumna chuh van dum sukha hiel in a nasa a.

¹¹Aw Pathien, nang chuh van khûp hiel khun chawih-at in na um inla: Na lopina chun leichung chengcheng hi luoh suok hen.