Read Gangte SAM 58 Bible Online

SAM 58 - Gangte bible

SAM 58

¹Diktat takin vai na hawm nau maw, nanguh pathiente haw? Mipite chung achun diktakin vai na hawm nau hi?

²Ahi puoi, na lunggil un thil phalo tak na ngaihtuoh sek u a; Leichung ahin na khut un thagum na suoh mang sek ui.

³Minunsie te chuh a nuu sunga kipan mawng mawng inle a chieh khiel u a, Pathien apat a khen in a um u a: A suok u akipat in zuou thugen a gen sek ui.

⁴Amau chun gûl guolin gu a nei u a, Thangchawm bengngawng, a bil him sek bang chuh ahiu.

⁵Zie chun gûl âi chawite chuh a ngaitha sek puoi, Bang tawbang a chalak in dawi mah leu le.

⁶Aw Pathien, a kam u a chun a hau haw hihbal sak inla, Aw LALPA, sakeibaknei hatlaite ha lienpi pi chu sukbal sak in.

⁷Amau haw chuh tui hattak a luong bangin tuimang u hen la; A thal a a dawih tieng leh, hampa guol a sat bul in um zel u hen.

⁸Napkawng, tuimang mai sek bang hi hiu henla: A hun lo a nau pieng, nisa himhim mulo tawbang hiu hen.

⁹Na bel hawu chun ling sut a het sang u a kin zaw’n, Amah chun chinpei in tawk mang intin, a hing leh a kuong lai le.

¹⁰Phuba lâkna chuh a muh tieng leh mi diktat chuh kipâk intin: Minunsie te thisan chun a keng chu sil ina.

¹¹Khutichun, mipite chun, “Mi diktat a ding chun kipahman a um tak taka; Lei ahin Pathien in vai a hawm tak tak ahi nai,” ti’n au.