Read Gangte SAM 59 Bible Online

SAM 59 - Gangte bible

SAM 59

¹Aw ka Pathien, ei dote lak ahin ei humbit inla, Ei suolte laka pat hin munsang ah ei khang in.

²Thil hihkhielte lak ah ei humbit inla, Thisan a dangchâk te lak ah ei hukdam in.

³Aw LALPA ka bawhsietna ziek hilo in, ka gitloh ziek le hi diek lo in, Ngaitie, ka hinna hi a châng zing ngâl u a, Mihat haw chuh ei kisuol pih dingin a kikhawm u a.

⁴Ka hihkhelh lohpi’n le a tai u a, a kiguonggalh u a; Hung tho inla, ei panpih dingin kisuhalh in,

⁵Aw LALPA, sepaihte Pathien, Israel te Pathien, Nangmah ngêi chuh namtin cheng tawh dingin tho in; Migukhah thil ngaihtuoh te chuh khat le sit ki’n. Selah

⁶Nitâk cheng leh a hungkit u a, ui guol in a hâm vengvung u a, Khawpi chuh a kimvel a kimvel u a.

⁷Ngaitie, a kam un a ik dawk u a; A mûk hawu thu chuh chemzâm hiem tak guola pawt in: kuo a a he um? a ti mai u a.

⁸Himahleh, Aw LALPA, nangin a mau haw chuh nuihsan zawn na tin; Awilo cheng chuh nuihsan phet inla.

⁹Aw ka hatna, hun pakcha’ng ka, Aw Pathien nang chuh ka kulh insang na hi ngâla.

¹⁰Ka chunga zaidawh Pathien chun a zaidawh dungzui in ei muok in a; Ka melmate chunga ka duhthusam chuh Pathien in ei muh sak ina.

¹¹Amau chuh that ki’n la, khutilochun ka mite’n hun hengilh kha’n au: Aw LALPA ka phawu na hi, Na thilhih theihna’n hih zak inla, hih niem in.

¹²A kam uh khelna leh a mûk u a thu pawt ziekin, A kiletsak nau ngêi a chun âwk u hen. A thugen sek uh sapsiet na leh zuou thu ziek tak inle.

¹³Amau haw chuh lungna’n katum hen la, a beih masang sieh un sumangthai in. Pathien in Jakob chungah vai a hawm hi tih he chiet u hen. Kâwlmawng tieng inle. Selah.

¹⁴Chun, nitâk lam in hungkit u henla, ui guol in hâm vengvung u henla; Khawpi chuh kimvel kimvel u hen.

¹⁵Amau chuh nek ding hawl in a vak vak u a, A vah kham uh a muh loh u chun zan khuo’n hâm un au.

¹⁶Himahlele ken chuh na hatna thu hi la’n sang ka ting; Ahi, zinglam in na zahngaihna ngeih tak in la’n sang ka ting; Nang chuh ka kulh insang, Ka lungdawn ni a ka kihumbitna na hi sek ngâla.

¹⁷Aw ka hatna, na kawmah pahchakna la sa’ng ka: Pathien chuh ka kulh insang, ka chunga zaidawh Pathien na hi ngâl a.