Read Gangte SAM 60 Bible Online

SAM 60 - Gangte bible

SAM 60

¹Aw Pathien nangin kei uh nei paih dawk a, ka bitnau na susie a; Na na lungna ta a; aw kei uh ei tung ding kit in.

²Zie gam hi na sulîng a, na khitkek sak ta a; A khitan haw chuh siempha kitin; a kilîng lîng ngâla.

³Na mite hi thil haksa na thuok saka: Humhaihna uain chuh nei dâwn sak ta a.

⁴Nang hun kihchate chuh puonzak na zak saka, Thutak ahih zieka zak a hih theih na dingin. Selah

⁵Na deihtak haw hi humbita a um theih na dingin, Na khut changlam in hukdam inla, ei dâwng in.

⁶Pathien in a thienthona a chun hiti hin a gen ta a; Kipak ing ka, Sekem khuo chu khenzak ing ka ting, Sukkoth guom chule khenzak ing ka.

⁷Gilead chuh keia ahi a, Manasseh le keia ahi; Ephraim chule ka luchang humbitna ahi a; Juda chuh ka lal tiengkhut ahi.

⁸Moab gam chuh ka kisilna bel ahi a, Edom gam a chun ka kengtawbek paih ing ka; Philistia chung achun guolzo in kiko ing ka, ti’n.

⁹Khawpi dettak achun kuo’n ei puilut ta die? Edom achun kuo’n ei pui ta die?

¹⁰Aw Pathien, nangmah mawng in nei paih dawk hilo ahim? Aw Pathien, ka Sepaihteu kieng a la na chieh puoh ngâla.

¹¹Ei dote suol dingin ei panpih inla: Mihiem panpihna chuh a thâwn ahi ngâla.

¹²Pathien vangin hattak in hih ing kau: Amah chun ei dote tawhden ding ahi ngâla.