Read Gangte SAM 62 Bible Online

SAM 62 - Gangte bible

SAM 62

¹Ka hinna hin thipkêi in Pathien maicha a ngak a: Amah a kipat chun ka hukdamna hung tung ding ahi.

²Amah mai chuh ka suongpi leh ei hukdampa ahi; Ka kulh insang ahi a, nasa takin kilîng puo’ng ka.

³Mi khat sietna dinga bang chana thil phalo na suongtuoh dinguh? Suong bang awn diei duoi leh, pal puk dek dek bangin, na bawn u a thah a um ding na hiu hi.

⁴Amin phatna apat sawtthâk ding guo mawng in a kiho u a; Zuou gen hi a lawp lam chau ahi a: A kam un vang a pieu a, himahleh a lungthim un a sam sie sek ngâl u a. Selah

⁵Ka hinna, thipkêi in Pathien mai cha ngak ah; Ka kinepna hi amah kawma pawt ahi ngâla.

⁶Amah mai chuh ka suongpi leh ka hukdamna ahi; Ka kulh insang ahi a, kilîng puo’ng ka.

⁷Pathien kawmah ka hukdamna leh ka lopina a um a: Ka hatna suongpi leh ka kihumbitna chuh Pathien ah a um hi.

⁸Nang haw mipite haw, bangtik inle amah chu gingchau inla, Na lungthim u chuh a âng a chun sungthau in; Pathien chuh ei a dingin kihumbitna ahi. Selah

⁹Mi nam neute chuh bangmah lo phet ahiu a, mi nam lien te le zuou mai ahiu hi: Bûkna a chun kikang untin; Abawn un le bangmah lo maimai sang in a zâng zawu hi.

¹⁰Nuoisieh na hi gingcha ki’n la, Mi ngawngtawih hile suon pên in nei diek ki’n; Neihzawhnate a hung pun inle a chungah na lunggil uh nga kiu in.

¹¹Pathien in khatvei a gen a; E! zie hi nihvei ka he tai; Thilhih theihna hi Pathien a ahi tih hi:

¹²Aw LALPA, zahngaihna hile nanga mah ahi: Mitin a thilhih dungzui chiet in na din sek ngâl a.