Read Gangte SAM 64 Bible Online

SAM 64 - Gangte bible

SAM 64

¹Aw Pathien ka lungdawn thu ahin ka aw na za’n la; Melmate lauh-um na lak a hin ka hinna humbit in.

²Thil phalo hih te kihogukna lak ahin ei selgu’n la; Thil hihkhielte thil guonggalh haw laka chun.

³Amau chun chemzâm bangin a mûk uh a tat hiem u a, A thal uh thu khate ngêi chun a dawi u a:

⁴Mi demna bei chuh mun thip a a lambut theih na dingun: Lau lo in thakhat in a kap phut sek ui.

⁵Thil gilo hih dingin a kitil u a; A gûk a thâng a kam thu hawu chun a holim sek u a; “Zie chuh kuo’n a mu die?” a tiu a.

⁶Dukdak lohna a hawl dawk sek u a; “Phachuomngai takin a hawl zo tau,” a tiu a: Mihing lungthim sung leh ngaihtuohna chu a thuk tak ahi chiet ngâl a.

⁷Himahlele Pathien in a thalchang in amau haw chu kap in tin; Phulo-halo in sukliem in um un au.

⁸Tichun, amau haw lei ngêi chun a siet nau tun ina, kisui lawn in um untin; Amau haw mu tapoh in a luchang uh thing un au.

⁹Chun micheng in lau untin uh; Pathien nasep chuh phuong untin, A thilhih chuh ching tak in gel det det’nau.

¹⁰Mi diktat haw chuh LALPA ah kipâk u hen la, amah a chun a ginnau ngau hen; Lunggil diktak pu chengcheng te chun suong un au.