Read Gangte SAM 66 Bible Online

SAM 66 - Gangte bible

SAM 66

¹Lei chung luoh chengcheng te haw, Pathien chawiân in lawp takin kiko unla:

²Amin lopi zie chuh la’n sa dawk unla; Amah chuh lopi takin pahchakna pieu in.

³Pathien kawmah “Na thilhih haw chu a huoisie na maizen e! Na thilhih theihna nasat ziekin nangmah hun dote chun na kawmah nuoilut chuh un au.

⁴Lei chung luoh chengcheng te hin ahun chibai u a, Nang hun pakcha’n la a sau hi; Na min pakcha’n la a sau hi,” tiu in. Selah

⁵Hung un la, Pathien thilhih haw hi en tiem u; Mihiem chate chunga a thilhih hi a lauh um ahi.

⁶Amah chun tuisuohgiet kha lei gaw a suok sak a: Luipi kha keng in a chieh kai u a, Zie tak a chun amah ah I kipâk u a.

⁷A thilhih theihna chun kumlekhuo’n vai a hawm a; A mit chun namtin a mu suok a, Kiphin hatte chu kilimbawl kiu hen. Selah

⁸Aw, mitin te haw, I Pathien u chuh pakchau inla, Amah pahchakna husa chu hetsak un.

⁹Amah chun I hinnau hi a hih hing zing a, I kalsuon u haw hi a tawh teu ding a phal puoi.

¹⁰Aw Pathien, nangin nei en chien a; Tangkaguo etchet bangin nei en chien a.

¹¹Nangin len sung ah nei pui a; Ka nungzang ahin puokgik tak na nga a,

¹²Nangin ka lu chung uh ka melmateu na tawh den saka; Tui leh meipi lak ah ka chieh pai u a; tichun, mun hausa taka lut dingin nei puidawk ta a.

¹³Na Ho-In achun hâlmanga thilpiek haw tawh lut ing ka ting, Ka thutiem te chu na kawmah guitun sak ing ka.

¹⁴Ka mûk in a gen a, Lungdawng a ka um laia ka kam in a thutiem te chuh.

¹⁵Gan thau tak chu hâlmanga thilpiek in na kawmah pie’ng ka ting, Belam chal hâlmang kithawihna meikhu tawh; Bâwngchal leh kel te chu hun pie’ng ka. Selah.

¹⁶Hung unla, ngaiun, nanguh Pathien kihcha chengcheng te haw, Tichun keia dinga a thilhih chu hun hetsak ing ka.

¹⁷Amah chuh ngeih tak in ka uou a, Chun amah chu ka leia limbawl in a um a.

¹⁸Ka lunggil a gitloh na ka ngaihsak chun LALPA’n ei ngaitha puo’n a:

¹⁹Himahlele, Pathien in ei ngaitha tak tak a; Ka pauchamna aw chu a bengkhawn ta a.

²⁰Pathien chuh pahchak in um hen, ka pauchamna ei lawhsap sak lo a, ka chunga a zahngaihna hailo a a lat sak ziekin.