Read Gangte SAM 68 Bible Online

SAM 68 - Gangte bible

SAM 68

¹Pathien chuh tho henla, a melmate chu nawhzak in um hen la; Amah mudahte le a masangah taisieu hen.

²Meikhu hi tawhmang a a um bangin, amau haw chu tawkmang in: Khuoilu mei lum a a tuithak guol in, Minunsiete chu Pathien masangah tui mang u hen.

³Himahlele mi diktat te chuh kipâk takin um hen la; Pathien masang ah lawp u hen. Ahi, kipâk takin lawp u hen.

⁴Pathien chawiân in lasau inla, a min pakcha’n lasau in: Kangtalai a gamgaw a chiehpaite ding chun lamlien sung pawng unla, A min chu JAH ahi; a masanga chun lawp un.

⁵Pathien a umna mun thiengtho a um chu Pa neilo haw pa, meithaite ngaihtuoh pa ahi.

⁶Pathien chun mi thawmhau te chu chênna ding a siem sak a: Suongkul a tânghaw chu vangphatna ah a puilut sek a: Himahleh kiphin hatte chu gamgaw ah a chen sak sek a.

⁷Aw Pathien, na mite ma a na hung pawt a, Gamgaw na hawhpai lai khan; Selah

⁸Lei a kilîng dul dul a, Van haw khule Pathien ma ah a tuitha tau a: Sinai tâng nasan le Pathien masangah, Israel Pathien masang a chun a kilîng dul dul kha.

⁹Aw Pathien nang chun guoh tampi na zuk saka, Na goluoh ding a chauh lai in na pie kita.

¹⁰Na gan guolte chu zie tak achun a cheng u a: Aw Pathien, nang chun na phatna chun panpih ngaite na panpih sek a.

¹¹LALPA’n thu chuh a pie seka Chanchin suoh haw chu pawl lien tak ahiu hi.

¹²Sepaihte lalte chuh a taisie a taisieu a: In ngak numeite chun gâllâk sum haw chuh a hawm u a.

¹³Belam huong achun ana kuol u henla, Vakhu tha dangkaguo a tuom a, Vakhu thate chu dangka guo a tuom hi henla, A thaveng chale sana eng taka tuom tawbang in,

¹⁴Bangkim hihthei in zie lalte a hih zak lai chun, Zalmon tânga vuk guoh zuk a a zuk lai tawbang ahi.

¹⁵Aw tâng lopi Bashan tâng, Bashan tâng chu tâng sang tak ahi.

¹⁶Tang sang tak haw, Pathien in a umna dinga a tâng deih chuh, Bangati a itthik taka en na him? Ahi, zie sung achun LALPA chu kumlekhuo’n um zing ding ahi.

¹⁷Pathien kangtalai haw chu a sing a singa, a sanga sang tamtak ahi, LALPA chuh Sinai tâng apat in a mun thiengtho ah a hunglut hi.

¹⁸Nang chuh tâng chunglam ah na kalto ta a, sala matte chu na pui a; Mihiem te apat chun thilpiek le na changa, Ahi, LALPA Pathien kalh a helte chu a kawm u ah a um ui.

¹⁹LALPA, nicheng a ka puokgik uh ei puok sak pa chu pahchak in um hen; Pathien chuh I hukdamnau ahi. Selah

²⁰Pathien chuh ei u dingin Tandawkpa Pathien ahi a; Thihna apat a suohchak na chuh LALPA, JEHOVAH ahi.

²¹Himahlele Pathien in amah dote luchang chuh sat phel phawk in a, Gitlohna lampi a chieh zel sambuoh taka chieh te chuh.

²²LALPA’n a gen a, “Bashan gama kipatin puikit ing ka ting, Tuisuohgiet lithuk tak apat chu puikit ing ka.

²³Na keng chuh thisan in na dieh thei a, Na ui lei haw chun na melmate laka chan a neih theih na ding in,” a ti a.

²⁴Aw Pathien, na chieh pêt u le a muu a, Ka Pathien, ka LALPEN, munthiengtho a a chieh pêt chuh.

²⁵Lasa pawlte chun ma a pui u a, a nung achun gihawih tumte’n a zui u a, a kikal achun nungak khuongbengte chu a um u a;

²⁶Mipi kikhawm haw lak achun Pathien pakchau inla, Israel tuinak a pawtte haw, LALPA ngêi chu pakchau in.

²⁷Zie tak achun cha sang dang pên Benjamin a vaihawm uh ahi a; Juda te miliente leh a upahawu tawh, Zebulun te miliente, Naphtali te miliente tawh.

²⁸Na Pathien chun na hatna chu thu a pie ta a; Aw Pathien, kei u dinga thil nei hih sak chu hihhat in.

²⁹Jerusalem a na Ho-In ziekin Lalte haw chun kipahman chu nang kieng ah hun puo’n au.

³⁰Luonglau laka gamsate chu hilhgaih inla, Bâwngchal tamtak, mitin bâwngno haw tawh, thilpiek utchate chuh tawh den inla, Kido utchate cheng chuh thehzak in.

³¹Aigupta gama kipatin sumeng haw hun paw lut untin; Ethiopia haw chuh a khut uh Pathien lama zak dingin kinawh un au.

³²Lei chunga lalgamte haw, Pathien pakcha’n la sau unla; Pathien pakcha’n la sau in; Selah

³³Vante, malai vante chunga chu pa kawm achun; Ngaitie, a aw a suoh ie, aw nasa tak mai chuh.

³⁴Pathien kawm achun hatna pieu inla, A zahum na chuh Israel chungah a um a, A hatna chu van dum haw akhun a um a.

³⁵Aw Pathien, na mun thiengtho haw apat in na lauh um hi; Amah Israel Pathien ngêi chun a mite kawmah hatna leh thilhih theihna a pie sek hi. Pathien chuh pahchak in um hen.