Read Gangte SAM 69 Bible Online

SAM 69 - Gangte bible

SAM 69

¹Aw Pathien ei hukdam inla; Tui haw chuh ka ngâwng tieng gei in a lut ta ngâl a.

²Buonthuok thuk tak, tawhchak pansakna ding um loh na ah, katum huoi huoi hi. Tui thuk tak, tuilien in ei chup zo tai.

³Ka kiko na lam ah ka chau a; ka dang a gaw zo tai: Ka Pathien ka ngak na ahin ka mit a vai tai.

⁴Aziek beia ei mudah haw chu ka sam zang sangin a tam u a Diklo taka ei do a ei sukmang guo te chu mihat tak ahiu: Khutichun, ka lak loh hiel chu ka ditkit dinga ahim?

⁵Aw Pathien, nangin ka ngawlna hi na he a; Ka gitlohna haw hi nang apat in sel ahi puoi.

⁶Aw Pathien, Sepaih haw Pathien, nangmah hun ngakte chuh kei ziekin muolpho kiu henla: Aw Israel Pathien, nang mah hun hawlte chuh kei ziekin zah loh in um kiu henla.

⁷Nang zieka gensiet ka thuok ziekin, Zahchâkna’n ka mai a khuh zo tai.

⁸Ka suohpihte lak ah malzin ka na hita a, Ka nu chate lak ah hêtkhâk loh ka na hi tai.

⁹Na In a ka phatchuom ngaihna’n ei ne zo ina; Nang hun gaite gaihna na chu ka chungah a chu ta a.

¹⁰Anngawla ka hinna ka kawihniem leh, Zie chuh ei gensietna a hung hi a.

¹¹Ka silhlechen dinga saidippuon ka mat leh, Amau dingin a sie lama tehkalna ka na hi zela.

¹²Kulh kawtkhak a chute chun ka chung thu a gen u a; Kei chuh zukham nuomte chun la ei phuok khum u a.

¹³Himahlele Aw LALPA, ken vang chuh, hun kipah um ah na kawmah ahi ka paucham sek; Aw Pathien na lungsietna nasa tak ziekin, Na hukdamna thutak in ei dâwng in.

¹⁴Buonthuok laka kipatin ei hukdawk inla, ei kiek tum sak hiel ki’n, Ei hawte lak leh tui thuk taka kipat hin humbit in nei um sak in.

¹⁵Tuilien chuh ei chup tum sak ki’n la, Tui thuk tak inle ei valh diek kihen; Kawkhuk inle a kam ei chih khum kihen.

¹⁶Aw LALPA, ei dâwng inla; na zaidawhna chu a pha ngâla: Na lungsietna nasat zie bang zelin kei lam hi hun nga’n la,

¹⁷Na suok kawm ahin na mai sel ki’n; Ka lungkham ngâla, ei dâwng nawm in.

¹⁸Ka hinna hi hun naih inla, tan in; Ei dote ziekin ei tandawk in.

¹⁹Nang in gensiet ka hihna te, ka muolphona te, ka zahchâk te hi na he a:

²⁰Mi ei gensietna hi ka thasietna ahi a; nasa tak mai in ka lungkham a: Tichun, ei lungsiet ding ka hawl a, himahleh kuomah a um puoh ngâl u a; Ei thamuon ding ka hawla, himahleh, kuomah ka mu puoi.

²¹Ka an dingin gu ei pieu a; Ka dangchâk lai in lah uain thuk dâwn ding ei pieu a.

²²A masang uh a a dawhkhâng u chu thâng na hi hen la; Thamuong taka a um lai un piel a na hi hen.

²³A mit hawu chu a muh theih loh na dingun, hih thim in um hen; A kâwng u chu kilin sak zingin.

²⁴Na lungkim lohna chu a chung u ah buotha’n la, A lungnat uh thangtawmna chun amau chu man hen.

²⁵A umnau chuh sukgam in um hen la; A puon in hawu achun kuomah cheng kiu hen.

²⁶Na zêp chuh a sugimthei u a; Na sukliemte lungkhamna le a gen ngâl zel u a.

²⁷A gitlohnau achun gitlohna behlap inla; Amau haw chuh na diktat na achun lut kiu hen.

²⁸Amau haw chuh hinna lehkhabu apat in thaihmang in um u henla, Mi diktatte lak achun ziklut hidah u hen.

²⁹Mahleh kei chuh gimthei tak leh lungkham tak ka hi a: Aw Pathien, na hukdamna chun munsang ah ei kawih hen.

³⁰Pathien min chuh la’n pakcha’ng ka ting, Kipah thugen in amah chuh limbawl ing ka.

³¹Khutibang chun bâwngchal ahim, ki leh tin nei bâwngchal ahim sang chun, LALPA hih kipâk zawna.

³²Tawhdena umte chun zie chu muu henla, kipâk u hen: Nanguh Pathien hawlte haw, na lunggil u chu sukthak in um hen.

³³LALPA’n tasamte chu a ngaitha a, Amah a dinga saltâng haw chule a musit puoh ngâl a.

³⁴Lei leh van chun amah chu pakcha hen, Tuisuohgiet haw leh a sunga thil tawithei taphawt te’n le pakchau hen.

³⁵Pathien in Zion hukdawk intin, Juda khawpi haw chu sakit ding ahi ngâl a; A suokte chu zie tak achun cheng untin uh, luoh ta’n au.

³⁶A suokte suonte chun luoh tau un tin; Amin ngaina haw chu a sung ah cheng un au.