Read Gangte SAM 7 Bible Online

SAM 7 - Gangte bible

SAM 7

¹Aw LALPA ka Pathien nang chuh ka kisêlna na hi a: Ei delh haw cheng lak a hin ei hukdam in ei humbit in:

²Khutilochun, humbitpa umlo in, Sakeibaknei bang in, ka hinna hi bawttel in, bawlsie khan a.

³Aw LALPA ka Pathien zie bang thil chuh hih ka na hih a. Ka khuta gitlohna ana um a hih a.

⁴Ka guolte chuh gitlohna a din ka hih chun. (ka melma chuh a ziek beia delh ka hih chun)

⁵Melma hin ka hinna hi a delh in, delhpha mai he uo; Ahi, ka hinna hi tuol ah tawh den henla, Ka hinna hi leivui lak ah silut hen. Selah.

⁶Aw LALPA, lungna’n kipan inla, Ei dote haw lungnatna do in kipan inla: Aw LALPA, tho dawk in, vaihawmna ding thu na pie ta ngâla.

⁷Tichun mitin kikhawmhaw chuh na kimvel ah um u hen: Chun, nang chuh a chunguh chunglam a chun va chu’n la.

⁸LALPA chun mitin cheng vai a hawm seka: Aw LALPA, keimah a diktatna leh ka lungthim phatna um bang zel hin ei vaihawm sak inla:

⁹Aw, migilote gitlohna chuh hung tâwp hen la, himahleh, mi diktat vang chuh hihdet in. Pathien diktat tak chun lunggil leh lungthim a en chien zel sek in.

¹⁰Pathien chuh ka phaw ahi a, Amah chun lunggil diktak pute chuh a hukdam sek hi.

¹¹Pathien mi diktatte vai a hawm sak a, chu vaihawmpa diktat ahi, Ahi, migilote chunga nichenga lung-awihlohna nei Pathien ahi.

¹²Mi ahung kilehhei loh vang leh amah chun a chemzâm tat hiem ina; A thalpo chuh a luoi a a kisazo tai.

¹³Thihna hiem matte chuh a mah thahna’n a siem zo kêi a; A thal haw chuh kuong thei in a siem a.

¹⁴Entie, minunsie te chun gitlohna a vawp u a; Ahi, thil sukkhelhna a vawp u a, zuou thu a puodawk sek ui.

¹⁵Kawkhuk a siem a, thuk tak in a lai a; Amah kawkhuk laih achun a kie ta a.

¹⁶A thil sukkhelh chuh amah lu chung ngêi ah hung vai kit intin. Hiemngam taka a thilhih chuh amah lusip ngêi ah kie’n a.

¹⁷LALPA chuh, a diktatna ziek hin, a kawmah kipah thu gen ing ka ting; LALPA Chungnung pên min pakcha’n la sa ding ka hi.