Read Gangte SAM 71 Bible Online

SAM 71 - Gangte bible

SAM 71

¹Aw LALPA, nang mah achun ka ginna ka nga sek a; Bangmah tikin ei muolpho sak ki’n.

²Na diktatna ziekin nei humbit in ei hukdawk in; Ka lam ahin na nakhang hun dâwn inla, ei hukdam in.

³Kei dingin bitna suongpi, kulhpi dettak hung hi’n; Nangin kei ei hukdam din thupiek na pie a; Nang chuh ka suongpi leh ka kulhpi na hi ngâla.

⁴Aw Pathien, mi nunsie khut apat ei hukdawk inla. Mi diktat lo leh mi ningkhelte khut apat chuh.

⁵Aw LALPA Pathien, nang chuh ka kinepna na hi a: Ka khangdawng lai apat ka gin chu na hi.

⁶Ka pien apat in le nang mah puih in ka na um a; Ka nu sûl apat ei ladawkpa na hii; Nang hi na hi, ka hun pahchak zing ding chuh.

⁷Mi tampi ngaih in thilmak bang ka hi a, Himahleh nang chuh ka kihumbit na dettak na hi.

⁸Ka kam hi na pahchakna’n a dim a, Nichang tumin na chawih-atna’n adim hi.

⁹Ka têk tieng lele ei paih tha ki’n la, Ka chauh tieng lele ei taihsan ki’n.

¹⁰Ka melmate chun ka chungthu a gen sek u a; Ka hinna entha haw chule a kihokhawm u a.

¹¹“Pathien in a hengilh tai: Delh unla, man tiem u; a hukdawk ding kuomah a um puoh ngâl un,” tin.

¹²Aw Pathien ei gamlat hiel ki’n la; Aw ka Pathien ei panpih dingin kin in.

¹³Ka hinna dote chuh muolpho leh beimang in um u hen la, Ka sietna ding hawl haw chu gensietna leh zahchâkna a khuh in um u henla;

¹⁴Himahlele, kei chuh kinem zing zieng ka ting, Hun chawiân deuh deuh ing ka.

¹⁵Ka kam hin na diktat na thu hilh in tin, Nichang tumin na hukdamna thu gen ina; A tam dân chuh ka he puoh ngâla.

¹⁶LALPA Pathien thilhih lopi tak haw tawh hung ing ka ting; Na diktatna, nangmah diktatna ngêi chu gen ing ka.

¹⁷Aw Pathien, ka khangdawng lai a kipatin nangin nei sinsak a; Tu tieng hin na thilmak hihhaw chu ka phuong sek hi.

¹⁸Ahi, Aw Pathien, ka têk a ka sam kân tieng lele ei taihsan ki’n la; Na hatna hi khangthak sawnte kawma le, Na thilhih theihna hi khang hung um dingte kawm ale ka phuon masang sieh in.

¹⁹Aw Pathien, na diktatna chun van a su a; Aw Pathien, nang thil lopi takte hih pa, Nang tawbang hi kuo a um?

²⁰Lungkhamna leh buoina nei muh sak a, Kei uh ei hih halh kit in na tin, Lei mun thuk tak apat in kei uh ei puidawk kit ding na hi.

²¹Nangin ka lopina ei hih pun sak inla, Hung kihei kitin nei thamuon inla.

²²Tumgit in hun pakcha’ng ka ting, Aw ka Pathien na ginumna ngêi chuh: Aw Israel mithiengtho, Kingkang in nang hun pakcha’n la sa’ng ka.

²³Na pahchakna la ka sak tieng leh ka mûk hi nasa takin kipâk in tin; Ka hinna na tatdawk hile lawp mah mah ina.

²⁴Ka lei hin le nichang tumin na diktatna thu gen intin; Ka sietna ding hawl haw chuh, a muolpho un a zakcha ta ngâl u a.