Read Gangte SAM 72 Bible Online

SAM 72 - Gangte bible

SAM 72

¹Aw Pathien, na dikna haw chuh leng pie’n la, Chun, na diktatna chuh leng chapa pie’n.

²Amah chun na mite chu diktatna’n vaihawm sak in a, Na mi gimtheite chu diktatna’n vaihawm sak in a.

³Tang lien haw chun na mite dingin hauhsakna hun suoh u henla, tâng neu haw hin diktatna’n, Mihaw kawmah thamuonna hun tun un au.

⁴Amah chun mi laka gimthei haw chu genpih intin, Tasamte chuh hukdam in a, Nuoisiehpa vang chuh chil gawp niuneu in a.

⁵Amah chun nisa a um lai chan in hun lau untin, Thapi a det lai chan khang chengcheng tiengin hun ho zing ta’n au.

⁶Amah chuh hampa ki-âttan chunga guoh zu bang hi’n tin: Lei chunga guohmal châk bang hi’n a.

⁷Mi diktat chuh a damlai in duoh hut hut hen la; Thapi a beih masang sieh in thamuong takin um hen.

⁸Amah chun tuisuohgiet apat tuisuohgiet dang tiengin-vaihawm in a, Luipi apat kâwlmawng tieng in le.

⁹A melmate chuh a masangah khun untin uh, Amah do haw chun le leivui liek un au.

¹⁰Tarshis gam leh tuikuol a leng te’n kipahman hun chawi in tin uh; Sheba leh Seba leng te’n thilpiek hun pien au.

¹¹Ahi, leng chengcheng chuh a masang ah khupbawk u henla; Chun, namtin chengin a na sem u hen.

¹²Tasamte chun a uou tieng u leh a humbit seka, Chagah leh panpih ding neilote chule a humbit sek hi.

¹³Tasam leh mi gimthei haw chuh a lungsiet a, Tasamte hinna chu a hukdam sek hi.

¹⁴A hinnau chu nuoisiehna leh khansietna lak apat tan in tin, A thisan u chuh amah mitmuh in lul tak ahi ngâla.

¹⁵Chun, amau chuh damsawt u henla, Sheba gam sana chu a mah piek hi hen. amah dingin pauchamna tawp lo in neih sak zing un tin, chun nicheng in pahchak in um ina.

¹⁶A gamsung achun buh tampi pieng intin; Tang chung haw achun kipei suousuou henla, A vui chu Lebanon bangin kilîng suousuou hen; Khawpi a mihaw chu lei a hampa bangin duoh hut hut un au.

¹⁷A min chuh kumlekhuo’n dai puo’n a; A minthanna chuh nisa umlai chan in dai puo’n a; Mihaw chuh amah achun vangsak in um untin uh; Namtin cheng in amah chuh nuomsa ti’n au.

¹⁸LALPA Pathien, Israel Pathien chuh pahchak in um hen. Thilmak haw hih chu Amah maicha hi ahi.

¹⁹Amin lopi tak chu kumlekhuo’n pahchak in um henla, Lei chung pumpi hi a lopina’n luoh suok hen. Amen, Amen.

²⁰Jessai chapa David pauchamna haw chu a tâwp tai.