Read Gangte SAM 73 Bible Online

SAM 73 - Gangte bible

SAM 73

¹Pathien chuh Israel chungah ana pha ngêi ie, Lunggil a thiengtho te chung achun.

²Himahlele, kei vang chun ka tawh teu vang vang a; Ka kalsuon haw hi a teu dek dek a.

³Minunsie haw vangphatna ka muh leh, Mi uong haw ka itthik ngâl a.

⁴Natna a nei puou a; a taksau chu a hisel in a hawih mah mah a, A hâtnau chu a det zaw bawn ngâl a.

⁵Midang guola gimthei in a um puou a; Midang guola gawt in le a um diek puou.

⁶Zieziekchun, chapona chun thikkawl guol in a ngâwng uh a viel a Nunsietna chun silhlechen guol in a tuom a.

⁷Thauna ziekin a mit uh a pawng a; A lunggil u a duhthusam sanga tamzaw a nei u a.

⁸A nuihsan u a, gilo tak in nuoisiehna thu a gen u a: Kiletsak takin a pau sek u a.

⁹A kam u chu van haw akhun a kawih u a, A lei u chun leichung hi a pha let khawp puoh a.

¹⁰Zieziekchun, a miteu chu a kinunghei u a a pakchau a, amau achun diklohna a mu puou hi.

¹¹“Pathien in bang a ti het die aw? Chungnung pên pa’n hetna a nei die aw?” a tiu a.

¹²Entie, zie haw hi minunsie ahiu ui; A um hiet hiet u a, a hausa deuh deuh u a.

¹³A thâwn mai in ka lunggil hi ka hih thien a, Ka khut haw hi gensiet bei a ka na sil a.

¹⁴Ni chang tumin gawt in ka um ngâla, Chun, zing cheng lele sawih in ka um zinga.

¹⁵Khutichun gen ing ka, na ti ta leng; Ngaitie, na chate khang sung a gukhah taka hih na hi’ng ka.

¹⁶Zie hi ka het ding dân ka ngaihtuoh leh, Kei dingin a na taluo deuh hi;

¹⁷Pathien mun thiengtho ah ka lut a, Tichun, a tawpna ding ka mu ta a.

¹⁸Amau chuh mun nâl taka chun kawih tei inla: Amau chuh sietna haw achun na paih tha seka.

¹⁹Bangti dana mitphetkal pheta chautha ahi tau em? Tizat-um taka hih mangthai a um ahi tau hi.

²⁰Mi a khanlawh nunga mang a ngaihtam u tawbang in, Aw LALPA na halh tieng leh amau haw lauhna chu ngaidau in la.

²¹Ka lunggil hi a lungkham a, Ka lunggel le sut bangin a um ngâla.

²²Mimawl leh bangmah helo ka hi a, Na masang achun gamsa tawbang phet ka hi.

²³Mahleh na kieng ah ka um zing zing hi: Ka khut changlam hi na tu zing sek a.

²⁴Nangin na lemguotna’n ei pui in na tin, Zie nung chuleh lopina a chun ei pui ding na hi.

²⁵Van a khun nang tih loh kuo ka nei em? Lei ah nang lo ngâl ka deih a um puoi.

²⁶Ka taksa leh ka lunggil hi chausie mah leh; Himahleh Pathien chuh kumlekhuo a ka lunggil hatna leh ka chanvo ding ahi.

²⁷Ngaitie, nang mah tawh gamla a umte chu beimang ding ahi ngâl un; A hun kilepsan ta cheng chu na sumang ta a.

²⁸Mahleh kei a dingin vang chuh Pathien naih hi a phai; LALPA Pathien chuh ka kihumbit na’n ka manga, a nasep chengcheng chu ka gen theih na dingin.