Read Gangte SAM 74 Bible Online

SAM 74 - Gangte bible

SAM 74

¹Aw Pathien, bangati a kumlekhuo a dinga kei uh ei paih tha na him? Bangati a na gan tatna muna belamte chung a hi na lungnat na meikhu mai ahim?

²Malai pek a na na châwksa na mi kikhawm haw kha hezing in, Na go dinga na tatdawk namte khah; Na chênna Zion tâng chuh hezing in.

³Kumkhuo sietna lam achun na kalsuon inla, Thil gilo tin cheng melma te’n a hih nau mun thiengtho achun.

⁴Na melmate chun na mun thiengtho sung achun a kiko u a; A tiemtehna hawu chuh a tâk dawk tau a.

⁵Mi gampi lak thing heicha a dawite bang ahiu a.

⁶Tu’n vang chuh a thil geikuok hawih uh kigawm chengcheng chuh Heicha leh sek in a hih sie tau a.

⁷Na munthiengtho chuh mei in a hâl u a; Na min umna mun chuh lei a tum hiel in a gensieu a

⁸A lungthim u chun, susie dimdem hitiu, a tiu a: Gamsung a Pathien hona In chengcheng chuh a hâltum zo tau a.

⁹Ka tiemtehnau haw le ka mu ta puou a; Thiemgau mawng mawng a um ta puou a; A sawt ding chin he mawng mawng ka lak u ah ka um ta puou hi.

¹⁰Aw Pathien, bang chana melma’n a hun gen siet ding? Melma chun na min hi kumlekhuo’n gensie ding ahi dem?

¹¹Banga tih leh na khut, na khut changlam ngêi kha na nung zûk a? Na angsung apat luoi dawk inla, amau chuh hih mangthai in.

¹²Himahlele Pathien chuh malai pek a ka Leng a na hi a, Lei lai taka hukdamna siempa chuh.

¹³Nang chun na hatna’n tuisuohgiet kha na hih khena: Nang chun tui laka dragon haw luchang chu na hih kek a.

¹⁴Nangin Leviathan luchang haw chu na khên gawp a, Nangin amah chu gamgaw a cheng haw an di’n na pie a.

¹⁵Nangin tuinak leh tuilien te nak ding na sukvan saka: Nangin lui lienpi te chu na hihkang a.

¹⁶Sun hi nanga ahi a, zan hi le nanga ahi. Thapi khu na sukdet ahi a, nisa khu vak dinga na guonggalh ahi.

¹⁷Lei chung gam chengcheng chu gamgi na zam chiet a; Nipi leh phalbi hi na bawl ahi.

¹⁸Aw LALPA, zie hi hezing in, melma chun a hun gensie a, Nam ngawl chun na min a gensieu kha.

¹⁹Aw na vakhu nunnem hi gamsa hâng kawm achun pie hiel ki’n; Na mi gimthei hinna hi kumlekhuo’n hengilh ki’n la.

²⁰Thugawlh chuh hun khawksak in: Lei mun thimna haw chu lah ngawngtawihna’n a dim ngâl a.

²¹Aw, nuoisiehna thuok haw chu muolpho in vaikit kiu hen la, Gimthei leh tasamte chun na min pakchau hen.

²²Aw Pathien, tho inla, nang mah thu chu kigen in. Kichitsakte’n nichang tuma a hun gensiet zie chu hezing in.

²³Nang mah hun dote aw chuh hengilh ki’n la, Na melmate kiko thawm chu a chieh to zing sek ngâl a.