Read Gangte SAM 75 Bible Online

SAM 75 - Gangte bible

SAM 75

¹Aw LALPA, kipahthu ka gen ui; Kipahthu ka gen ui, na min a nai ngâla: Mite chun na thilmak hih te chu a gen sek u a.

²Hun guot chuh ka muh tieng leh, “Diktak in vaihawm ing ka.

³Lei leh a chunga um chengcheng chuh a tuimang zo tai: Ken a khuom haw chuh ka phuh ahi. Selah

⁴Mi chapote kawm achun, Chapo takin um ki’n, ka ti a; Minunsie te kawmah, Na kiu hih pawm kiu, ka ti a.

⁵Na kiu chu chunglam ah dawmsang kiu un; Ngawng chang hiel in thu gen kiu un.”

⁶Dawpsânna chuh suohlam a kipan ahi puoh a, thanglam a kipan le ahi diek puoh a, Simlam a kipan le ahi diek puoi.

⁷Mahleh Pathien chuh vaihawmpa ahi: Amah chun khat a kawih niem a, khat a dawm sang sek hi.

⁸LALPA khut achun khawn a um a, chun uain chu a phuon a thil helkhawm in a dim a, amah chun zie mah chu a sung dawk a; Thawnlo in a nen haw na tiengin, lei a minunsie haw chengcheng in dâwn thieng tin ten un au.

⁹Himahlele kei chuh kumlekhuo’n kipâk ing ka ting, Jakob Pathien pakcha’n la sang ka.

¹⁰Minunsie te kihaw chuh tan tha’ng ka ting; Mahleh, mi diktatte ki vang chuh dawpsân in um ina.