Read Gangte SAM 77 Bible Online

SAM 77 - Gangte bible

SAM 77

¹Ka aw hin Pathien chuh ngeih tak in uou ing ka ting; Ka aw chun Pathien ngêi chuh uou ing ka, amah chun ka aw a zak theih na dingin.

²Ka lungkham ni chun LALPA ka hawl a, Ka khut hi zan nasan inle chawllo in ka zak zinga; Ka hinna hin thamuon a nuom puoi.

³Pathien ka ngaihtuoh a, ka buoi sek; Ka het sak a, ka thagau hi a chautha sek hi. Selah

⁴Ka mit haw hi na hah sak zinga; Pau mawh hiel in ka lungkham zing hi.

⁵Malai nite chu ka ngaihtuoh ta a. Malai hun leh kum te chu ka hezing a.

⁶Zan a ka lasak ka he dawk kit a: Ka lunggil in ka ngaihtuoh sek a; Ka thagau in le a ngaihtuoh det det sek hi.

⁷LALPA chun kumlekhuo a thahtha ding ahi die aw? Amah chun ei deih talo ding ahi dem?

⁸A lungsietna chu kumlekhuo a bei den ding ahi dem? A thutiem chu kumlekhuo a bei ding ahi die aw?

⁹Pathien chun lungsietna a hengilh die aw? A lungsiet na nem chu lungnat na’n a khâk ahi ta die aw? Selah

¹⁰Chun, zie chu ka lungkham ziek ahi, ka ti a; Himahleh, Chungnung pên pa khut changlam suklamdang a a um hi ahi,

¹¹LALPA thilhih haw kha hilhchien ing ka ting; Malai pek a na thilmak haw kha ka hetzing ding ziekin.

¹²Na nasep chengcheng kha ngaihtuoh ing ka, Na thilhih nasa tak haw kha sut ing ka, ka ti a.

¹³Aw Pathien, na lampi chu a thiengtho a: Ka Pathien uh bang hi pathien lopi kuo a um?

¹⁴Nang chuh thilmak haw hih sek Pathien na hi a; Mi cheng lak achun na hat zie na etsak sek a.

¹⁵Na khut hattak in na mite na hukdawk seka; Jakob leh Joseph suonte chuh. Selah

¹⁶Aw Pathien, tui haw chun a hun muu a; Tui haw chun a hun muh tieng u leh, a lau ui: Tui thuk tak haw chule a kilîng ui.

¹⁷Meipi haw khun tui a buothau a; Van haw khu a giu a, Na thalte chule muntin ah a phe zat zat a.

¹⁸Na van gi husa chuh chinpei ah a um a; Na kawlphe haw chun khawvel hi a salh zawt zawt a, Lei hi kilîng in a kithing dul dul a.

¹⁹Na lampi chu tuisuohgiet ah a um a, Na chieh na lampi chu tuilien tak ah a um a. Hilele, na niek nung chale het ahi puoi.

²⁰Na mite chuh belam hawn bangin, Mosi leh Aron khut in na pui sek a.