Read Gangte SAM 78 Bible Online

SAM 78 - Gangte bible

SAM 78

¹Aw ka mite haw, ka dân thu ahin nakhang a na dawh unla; Ka kama thu haw ahin na nakhang uh hun dawh tiem u.

²Tehkal thu’n ka kam ka’ng ka ting, Malai pek a thugil kigen haw kha gendawk ing ka.

³Ziehaw chu ka bil un ka zau a, ka lunggil un ka heu a, Ei suonteu in ei na hilh tâk u khah.

⁴Ziehaw chu a chateu lak ah îm puoi ting un, Khangthak hung um dingte kawmah LALPA Pahchakna thu leh, A hât zie leh a thilmak hih haw chu gen zawi tiu.

⁵Jakob achun a thuguot chuh a phut det a, Israel kieng ah dân a guot a, Ziehaw chuh ei suonteu kawmah thupiek in a pie a, Amau chun zie thu chuh a suonteu kawma a hetsak dingun.

⁶Khangthak hung um zel ding, naupang hung pieng ding haw chun a hettheih na dingun; Ziehaw chuh a hung thawh u a, a chateu a hilh sawn zel theih na dingun.

⁷Tia chuh a kinepnau chuh Pathien a a ngak theih u a, Pathien thilhih haw chuh a hetngilh loh u a, A thupiek haw chuh a zuih zawk na dingun.

⁸A suonteu banga, Suon genhak leh kiphin hât; Suon lunggil detlo, Pathien kawma lunggil muon umlo pu a a um loh na dingun.

⁹Ephraim suonte chuh gâlvan a kivan a, thallung chawiin, Kisuol ni chun a taizak u a.

¹⁰Pathien thugawlh chuh a zui puou a, A dân a um a nuom puoh nalai set u a.

¹¹A thilhih haw chuh a hengilh u a, A thilmak hih amau a muh sak haw chu tawh,

¹²A suonteu mitmuh in thilmak mak a hih sek a, Aigupta gama, Zoan phaicham achun.

¹³Tuisuohgiet chuh a hih khen phawk a, amau haw a galkaih sak a, Tui haw chuh bangkhat kawihkhâwm bangin a din sak met mût a.

¹⁴Sun leh meipi’n a pui a, Chun, zan cheng leh meipi vak in a pui sek a.

¹⁵Gam gaw achun suongpi te a hih phel a, Tui thuk taka kipatin deihkhawp a dâwn ding amau a pie a.

¹⁶Suongpi a kipat chun luicha a luon dawk sak a, Tui haw chuh luipi bangin a luon dawk sak a.

¹⁷Khuti nasan chun le a chungah thil a sukhiel nalai u a, Gamgaw achun Chungnung pên chungah a kiphin u a.

¹⁸A lunggil u a Pathien zedap in, A thil duhchak hawu chuh ngên in a kiphin u a.

¹⁹Ahi, Pathien kalh in thu a gen u a, “Gamgaw ahin Pathien in dawhkhâng a guonggalh theia ahim?

²⁰Ngaitie, suongpi chuh a khena, tui haw chuh a hung kikhawh dawk a, Luicha haw chuh a kuong a let zuoh zuoh a; Chângthâk le a pie theia ahim? A mite a ding hin sa a pie die aw?” a tiu a.

²¹Zieziekchun, LALPA chun a na he ta a, chun a lungna a: Jakob chungah mei a hung kuong dawk a, Israel chungah lungnatna a hung pung ta a.

²²Pathien a taksan loh u a, A hukdamna le a taksan loh ziekun.

²³Himahleh, chunglam van dum haw khu thu a pie a, Chun, van kawtkhak haw chu a hawng a;

²⁴A nek ding un Manna kha a chung u ah a zuk sak sek a, Amau chuh van buh a pie a.

²⁵Mihiem te’n vânsâwlchâk te chângthâk chu a neu a: Vahna kham in amau chuh an a hun pie a.

²⁶Amah chun khawsak huih chu van ah a nun sak a, A thilhih theihna’n sim huih chu a pui ta a.

²⁷Amah chun sa chu leivui tawbang hiel in a chung u ah a zuk sak a; Vacha tha nei chule tuisuohgiet pîlnel tawbang in.

²⁸A giehmun uh ah a kiek saka, A umnau bûk kiengvêl haw achun.

²⁹Khutichun vah takin a neu a, Amah chun a utchak u chu a pie ta a,

³⁰Himahleh, a an nêk u chuh a kamsung u ah um zing sa’n le, a utchak uh a hai diek puoh a.

³¹Ziephet chun Pathien chuh a chung u ah a lungna ta a, A miteu laka a hât cha cha a that a, Israel tangval haw chuh a zêp pai lem lum a.

³²Khuti nasan chun le thil a hihkhiel zing zing u a, Thilmak a hihsa’n le a taksang chuom puou.

³³Zieziekchun a damsung niu chu hu guolin a mang thak a, A damsung kumteu chuh lauhna’n a hih bei sak a.

³⁴Amau haw a thah tieng leh amah chu a hawl sek u a: A vaikit u a, tihtakzet in Pathien a hawl sek ui.

³⁵Pathien chuh a suongpiu a hi tih leh, Pathien Chungnung pên pa chuh a tan pau ahi tih a hedawk sek ui.

³⁶Himahlele, amah chuh a kam un a pakcha lêm u a, A lei un a kawmah zuou thu a gen sek ui.

³⁷A lungthim u chuh amah lam ah a dik puoh ngâl a, A thugawlh u achun le a muon-um diek puou hi.

³⁸Himahlele amah chuh lainatna a dim ziekin, a gitloh nau chuh a ngaidam a, amau haw chuh a sumang puoi; Ahi, a lungnat na chuh tampi vei a zûkkik a, A lungnat na chengcheng chu a chawktho nuom sek puoi

³⁹Amau chuh phehlevo mai ahiu hi tih a hezing a, Huih hung nung vaikit talo ding tawbang hiu.

⁴⁰Gamgaw akhan amah chungah a kiphin zing u a, Gamgaw achun amah chuh a sulungkham u a!

⁴¹A vel velin Pathien a patep u a, Israel mithiengtho chuh a sunuok sek ui.

⁴²A thilhih theihna chuh a lunggil un a vawp zing puou a, Melma laka a humbit ni chuh a hezing sek puou hi.

⁴³Aigupta gama a tiemtehna te a kawih dân leh Zoan phaicham a a thilmak hih haw chuh.

⁴⁴A luipi teu chuh thisan a suoh sak a, Tichun, a luicha tui hawu chu a dâwn thei ta puou hi.

⁴⁵A lak u ah tho hawnpi a sawl a, ziehaw chun amau haw a ne zo u a, Uphawk hawn a sawl a, ziehaw chun amau chu a susie ta a.

⁴⁶A thaichi hawu chu lung a pie a, Chun, a nasep gah u chuh khaupe a pie a.

⁴⁷A grep guihawu chu giel in a sep sie a, A theipi kung uh haw chu vuk in a mêk gawp a.

⁴⁸A bâwngguol hawu chule giel a pie a, Chun, a belam guol hawu chule kêk a seh sak a.

⁴⁹A lungnatna lauh-um tak chu a chung u ah a khie a, Lungnatna, lunghihlohna mah mah leh buoina te, Sietna vânsâwlchâk hawnte chu hun sawl in.

⁵⁰A lungnat na a dingin lampi a siem a; A hinnau chuh thihna lak ah a hum puoh a, Mahleh, a hinnau chuh hi a pie ta ngâl a.

⁵¹Aigupta gama nau lutîl chengcheng a that a, Ham puon-In a a hâtnau gah masapen te chuh.

⁵²Tichun, amah mite chuh belam hawn bangin a puidawk a, Amau haw chuh a gan guol tawbang in gamgaw akhan a pui a.

⁵³Bit takin amau haw chuh a pui a; khutichun bang mah a lau puou ui; Himahlele Tuisuohgiet chun a melmateu chu a valh zo ta a.

⁵⁴Chun, a mun thiengtho chu a puitung a, Zie tâng chu a khut changlam a a châwk ahi.

⁵⁵Namtin chuh a masang uh ah a nawhdawk a, Amau haw chuh a gochan ding in a hawm a, A puon in hawu achun Israel namte chuh a um sak ta a.

⁵⁶Khutisa chun le, Pathien Chungnung pên pa chuh a zedap u a, a chungah a kiphin u a.

⁵⁷Himahleh, a kilehhei u a, a suonteu bangin gukhah takin a hih zaw tau a; Thalpi lung kâwi tawbang in a chieh kâwi u a.

⁵⁸A munsangteu in amah chuh a sulungnau a, A milim geikuok hawu in amah chuh a thik sak behlap a.

⁵⁹Pathien in zie chuh a het in a lungna mah mah a, Israel haw chuh a paih tha ta a.

⁶⁰Khutichun, Shiloh bukcha, Mihiem te laka a chênna chuh a taihsan ta a;

⁶¹A hatna chuh sal in a mat saka, A lopina chuh melma khut ah a piedawk behlap a.

⁶²A mite chuh chemzâm kawmah a pie a, A goluoh ding chung achun a lungna ta a.

⁶³A tangval teu chuh mei in a katum a; A nungak teu chun kichênna la mawng mawng a nei ta puou hi.

⁶⁴A thiemputeu chuh chemzâm a satlup in a um u a; A meithai teu chun sûnna himhim a siem puou hi.

⁶⁵Zie lai chun LALPA chuh, mi a ipmu a hung khanglo bang in, a hung halh ta a, Mihat uain zieka kiko tawbang in.

⁶⁶Amah melmate chuh a zêp kik a, Kumlekhuo a zahchâkna a lawh sak ta a.

⁶⁷Khutichun, Joseph puon-In chu a paih tha a, Ephraim nam chuh a tel puoh behlap a.

⁶⁸Himahleh, Juda nam chuh a tel zaw ta a, A hehpih Zion tâng chuh,

⁶⁹A In thiengtho chu van sang haw guol khun a sa a, Kumlekhuo a a sukdet leichung tawbang hin.

⁷⁰A suok David a tel a, Belam huong a kipat chun a ladawk a:

⁷¹A mi Jakob te leh a goluoh ding Israel te vak dingin, a belam nokaite chinna lak apat in a puidawk a,

⁷²Amah chun a lunggil a dikna bang zel in a mau chuh a vak a; Chun, thiem takin amau haw chuh a puihuoi hi.