Read Gangte SAM 79 Bible Online

SAM 79 - Gangte bible

SAM 79

¹Aw Pathien, namte chuh na goluoh ding ahin a lut u a; Na Ho-In thiengtho hi a subuok u a;

²Na sawntawlawi te luong chu chung leng vachate an dingin a pieu a, Na mithiengtho te sa chu gamsa haw a pieu a.

³A thisan u chuh Jerusalem vela tui bangin a buothau a; Amau haw vui ding chu lah kuomah a um puou a.

⁴Ka kimvel u a mihaw gensiet in ka um u a, Ka kiengvêl u a mite muhsit leh nuihsan in ka um tau hi.

⁵Aw LALPA, bang chan ahi die na lungnat kumlekhuo ding? Bangti a na itthikna chu mei banga kuong ding ahim?

⁶Nang mah hun helo, ginglo haw chung ahin na lungnat na chu buotha’n. Na min sam lo lalgam haw chung ale.

⁷Jakob chuh a ne zo u a, A umna chuh a sugam ta ngâl u a.

⁸Keihaw ei suonteu thulimlohna kha kei u chung ahin hezing ki’n la, Na lainatna chun ei muok dingin hung vak hen. Hahpi a tawh den in ka um ngâl u a.

⁹Aw ei hukdampa Pathien, na min lopina dingin kei uh ei panpih in; Na min ziekin kei uh ei humbit inla, ka gitloh na teu hi silngim in.

¹⁰Bangatih leh namte chun, “A Pathien u chuh khawitaka um ahi?” a tih zing sek u a. Na suokte thisan phuba chu lak hi hen la, Ka mitmuh un ginglo haw lak a hin suklat hi hen la.

¹¹Suongkul tângte tau git chu na masang ah tung hen la; Thi dinga guot haw chuh na thilhih theihna nasat zie bang zelin humbit in.

¹²Aw LALPA, nangmah a hun gensiet nau kha, Ka kimvel u a te angsung ah a leh sagih in din kit in,

¹³Khutichun, kei uh na miteu, na gan tatna mun a belamte hin, kumlekhuo’n na kawmah kipahthu gen ung ka ting un: A khang a khang in nang hun pakcha zing ta’ng kau.