Read Gangte SAM 84 Bible Online

SAM 84 - Gangte bible

SAM 84

¹Aw sepaihte LALPA, Na bukcha haw chuh a deihum na mai zên e!

²Ka hinna hin LALPA ho-in huongsung inmai chuh a ngai mah mah a, ahii, a sawlsam hiel sek a; Ka lungchang leh ka phehlevo hi Pathien hing kieng a chun a kiko dawk a.

³Aw sepaihte LALPA, ka lal leh ka Pathien, nangmah maichâm achun vasie nasan in In a nei a, Chun, pielpa’n le a chênna ding leh a no kawih na dingin bu a nei hi.

⁴Na in a chêngte chuh a hamphau hi; Nang chuh hun pakcha zing un au. Selah.

⁵Nang mah a hatna nei mi chuh a navak hi; A lungthim a Zion zawtna lamlien te umna chuh.

⁶Kahna guom hawhpai in, tuinak haw umnate a siem sek u a; Ahi, guohtui kie masa chun vangsakna’n a khuh zel hi.

⁷Hatna a kipatin hât zawk diek na ah a chieh sek u a, Zion Pathien âng a chun a kimuhsak chiet sek ui.

⁸Aw LALPA sepaihte Pathien, ka pauchamna hi ei ngaihthak sak inla; Aw Jakob Pathien, nakhang a na dawh in. Selah

⁹Entie, Aw Pathien ka phawu, Na sathau nuh mel hi hun en in.

¹⁰Na ho-in huongsung a ni khat um hile, ni sangkhat mun dang um sangin a phazaw ngâl a. Nunsietna puon-In haw poh a um sangin, ka Pathien In a kawtkhak ngak hih le ka ut zaw hiel hi.

¹¹LALPA Pathien chuh nisa leh phaw ahi ngâla: Amah chun deihsakna leh zahna pien tin: Diktaka umte kawm a chun thilpha mawng mawng it hiel puo’n a.

¹²Aw sepaihte LALPA, Nang hun gingchate chuh mi hampha ahiu hi.