Read Gangte SAM 88 Bible Online

SAM 88 - Gangte bible

SAM 88

¹Aw LALPA, ei hukdampa Pathien, Sun leh zan in na masangah ka kiko zing sek a:

²Ka pauchamna hi na masang hung tung henla; Ka kiko husa ahin na nakhang hun dawh in.

³Ka hinna hi lungkham na’n a dim a, Ka hinna hin Sheol chuh a hun naih ta ngâla.

⁴Kawkhuk a chieh suk te laka simtel ka hi a; Panpihtu neilo tawbang ka hi:

⁵Mi thite hetngilh a um bang leh, thah a um a thana kuol tawbang ka hi a; Ziehaw chuh hetzing hitalo tawbang, Amau chuh na khut apat paih thak a hih tâk ziekun.

⁶Kawkhuk nuoinung pen ah nei kuol sak ta a, Mun thim tak, thuk taka chun.

⁷Na lungnat na chun ei delhchak kêi a, Nangin na tui kinawk chengcheng in nei sugimthei ta a. Selah

⁸Ka melhet te chuh ei gamlat in na umsak a; Amau dingin kihdak um takin nei bawl a: Khakkhum in ka um a, pawt thei lo ka hi.

⁹Gimtheihna ziekin ka mit asie tul tul a: Aw LALPA, nicheng in ka hun sama, Nang lam ah ka khutte ka zak a.

¹⁰Mithi haw ding chun thilmak hih ding na him? Mi thite chu hung tho kitin a hun pakcha ding u a ahim? Selah

¹¹Na zaidawh zie chu thana suklat ahi dem? Ahihloh leh na muon-um zie chu Beimanna muna hetsak a um ding na hi a ahim?

¹²Na thilmak hihhaw chu thim laka hetsak a um ding ahim? Na diktatna chuh hetngilhna gam ahin aphachuom ding a ahim?

¹³Mahleh Aw LALPA, kei vang chun ka hun uou a, Ka pauchamna chuh zinglam in na ma ah hung tung ina.

¹⁴LALPA, bangati a ka hinna hi thahthawt na him? Bangatih leh kei apat a na mai sel na him?

¹⁵Ka neucha akipat in gimthei tak leh thi vang. vangin ka um sek a: Na thil huoisie takte ka thuok in hih lungkham in ka um hi.

¹⁶Na lungnatna nasa tak chun ei vuk tuma; Na thil huoisie tak haw chun ei sumangthai ta a.

¹⁷Ziehaw chun nichang tumin tuilien bangin ei um suok a; Ei um suok kêi u a.

¹⁸Ei hehpih leh ka guolphate chuh gamla tak ah na um sak a, Ka melhet haw chuh thimlak ah na umsak behlap nalai a.