Read Gangte SAM 89 Bible Online

SAM 89 - Gangte bible

SAM 89

¹LALPA chitna thu haw chuh kumlekhuo’n la’n sang ka ting: Ka kam in na muon-um zie chu khang chengcheng chan in hetsak ing ka.

²Zaidawhna chuh kumlekhuo a dingin lemtoh in um in a; Na muon-um na chu van haw ngêi akhun sudet inla, ka ti a a.

³“Ka mi tel chu tawh thugawlh ka siem a, Ka sawntawlawi David kawmah ka kihâksiel ta a;

⁴Na suonte chu kumlekhuo a dingin sudet ing ka ting, Na lalchutphah le khang chengcheng tieng in lemto ing ka.” Selah

⁵Aw LALPA, van haw khun na thilmak hih haw hi pakchau hen la; Mi thiengtho haw kikhawpna a khun na muon-um na hi, pakcha’n au.

⁶Van dum akhun LALPA tawh tehkal theih ding kuo a um a ahim? Van mite laka khun LALPA tawbang kuo a um?

⁷Mi thiengtho haw kikhawp khawmna a Pathien lauh um tak, A kiengvêl u a mi cheng cheng sanga lopi leh tizat-um chuh kuo a um ta dem?

⁸Aw LALPA, sepaihte haw Pathien, Aw JAA, nang tawbang mihat kuo a um a? Na muon um na chu na kimvel ah a um ngâl a.

⁹Nang chun tuipi kinawk vutvut chung achun vai na hawm sek a; A tuifawn kinawk lai chu na suhai sek a.

¹⁰Nang chun Rahab chu gâl thah bang in na sugawp dimdem a, Nang hun dote chuh na bân tha hatna’n na hih zak ta a.

¹¹Van haw khu nanga ahi a, lei hile nanga ahi: Khawvel leh a sunga um chengcheng hi nang mah tun dawk ahi.

¹²Sim leh mâl chuh nang mah siem ahi a; Tabor leh Harmon chun na min ziekin lawp in la a sa sek ui.

¹³Nang chun bân thilhih thei tak na nei a; Na khut a hât a, na khut changlam chu limbawl in a um a.

¹⁴Diktatna leh vaihawmna chu na lalchutphah kingakna ahii: Zahngaihna leh thutak chu na masangah a chieh sek hi.

¹⁵Husa kipâk-um he sek nam chuh a hamphau hi; Aw LALPA, amau haw chuh na melvak ah a um sek ui.

¹⁶Na min ziekin nichang tumin a lawp sek u a: Na diktatna ziekin limbawl in a um sek ui.

¹⁷Nang chuh a hâtnau lopina na hi ngâla; Na deihsakna ziekin ka kiu hi limbawl in um in a.

¹⁸Ka phawu hi LALPA a ahi ngâla; Ka Lal u hi Israel Mi Thiengtho ahi!

¹⁹Malai in mi ginumte kawm achun vaulam in thu na gen a, “Mi khat hattak chung a chun panpihna ka ngên a; Mihat haw laka teldawk chu ka limbawl ta a.

²⁰Ka suok David chuh ka mudawk ta a; Ka sathau thiengtho chu amah chuh ka nuh ta a:

²¹Ka khut hi amah kawma hihdet in a um a: Ka bân in amah chuh hihhat ina.

²²Melma chun amah chuh zo puo’n a; Nunsietna cha’n le a sugimthei diek puou hi.

²³A melmate chuh a masangah sunel ing ka ting, Amah mudah te chuh khen pai ing ka.

²⁴Mahleh ka muon-um na leh ka zahngaihna chuh amah kawmah um ina; Ka min ziekin a ki chu limbawl in um ina.

²⁵A khut chule tuisuohgiet achun ngak sak ing ka ting, A khut changlam chu luipi chung haw achun.

²⁶Amah chun, ‘Nang chuh ka pa, Ka Pathien leh ka hukdamna suongpi na hi,’ ti’n kiko ina.

²⁷Chun, kei chun amah chuh ka cha masa’n siem ing ka ting, Leia lalte lak ah chungnung pên in siem ing ka.

²⁸Ka zahngaihna chuh amah dingin kumlekhuo’n vawpphat sak ing ka ting, Ka thugawlh chuh amah ah dettak in um ina.

²⁹A suonte chuh kumlekhuo’n sudet ing ka ting, A lalchutphah chule van um lai chanin um sak ing ka.

³⁰“A chate chun ka dân hi a kiheisan u a, Ka vaihawm haw banga a um loh u a;

³¹Amau in ka dante a bawhsiet u a, Ka thupiek haw a vawpphat loh u chun;

³²A sukkhelhnateu chuh mawlh in hung veh tha’ng ka, A thulimlohnau chu zêp in hung veh tha’ng ka.

³³Himahlele ka zahngaihna chuh a kawma pat chawnmang puo’ng ka ting, Ka muon-um na chuh zuou a hung hih ding phal diek puo’ng ka.

³⁴Ka thugawlh chuh susie puo’ng ka ting, Ka mûk a thu pawt chuh hih zatchuom diek puo’ng ka.

³⁵“Khatvei ka Thienthona ziek in ka kihâksiel a; David kawmah zuou gen puo’ng ka.

³⁶A suonte chuh kumlekhuo’n um intin uh, A lalchutphah chuh ka masangah nisa um lai chan in um ina.

³⁷Tha tawbang in kumlekhuo a din hih det in um intin, Van um sung chengin hetpih muon-um tawbang in um ina.” Selah

³⁸Mahleh nang chun na paih tha a na deih puoh a, Na sathau nuh chung achun na lungna ta a.

³⁹Na suok tawh na thugawlh chuh na paih tha a: A lallukhuk chuh lei ah na paih thak sak a.

⁴⁰A dai chengcheng chu na susie a; A kulhpite chuh na hihsie ta a.

⁴¹Lampi a hawh malam chengin thil a lâksak zel sek u a; A kimvel a mihaw gensiet in a hung um ta a.

⁴²A gâlte khut changlam chuh na limbawl a; A melmate chengcheng chuh na sukipak ta a.

⁴³Ahi, a chemzâm hiem chuh na vaihkit saka, Amah chuh kidona achun na din det sak ta puoh a.

⁴⁴A lal tieng chuh a khut apat in na lâksak a, A lalchutphah chuh lei ah na paih tha ta a.

⁴⁵A vanglai nihaw chuh na hih chawm sak a; Amah chuh muolpho na’n na khuh ta ngâl a. Selah

⁴⁶Aw LALPA bang chana na kisel kumlekhuo ding? Bang chana na lungnat na chuh mei banga a kuon nak lai ding?

⁴⁷Aw ka hinkhuo chawm ding dân hi hezing inla, Mihiem chate chengcheng hi na na siem dukdak mawh ngêi ie!

⁴⁸Kuo ahi thih ni mulo a hing zing? Kuo ahi Sheol khut apat a a hinna humbit thei ding? Selah

⁴⁹Aw LALPA, malaia na lungsietna, Na muon um na a David kawma na kihâksiel kha khawi ah a um ta?

⁵⁰Aw LALPA na sawntawlawi te a gensietnau hezing inla; Mipite ei gensiet na ka ângsung a ka thawk sek zie hih;

⁵¹Aw LALPA, nang hun dote gensiet na, Na sathau nuh niek nung haw gensietna chuh.

⁵²LALPA chuh kumlekhuo’n pahchak in um hen. Amen, Amen.