Read Gangte SAM 9 Bible Online

SAM 9 - Gangte bible

SAM 9

¹LALPA chuh ka lunggil chengcheng in pakcha’ng ka ting, A thilmak hih chengcheng chuh hetsak ing ka.

²Nangmah achun kipâk in lawp ing ka ting Aw, Chungnung pên na min pakcha’n la sang ka,

³Ei dote chuh a taihsiet tak u leh, Na âng achun a kipalpuk u a, a beimang sek ui.

⁴Kei a ding chun adik lam leh ka thu a hin nang nei panpih ngâla, Diktat taka vaihawm in lalchutphah a chun na chu a.

⁵Namtin na hilhgaih a, mi dukdaklote chuh na sumang a, Amin u chuh kumkhuo a dingin na thaimang ta a.

⁶Melmate chuh kumsawt a dingin a mang zo u a, kumkhuo sawt a ding in bangmah neilo in a um tau hi; A khawpi teu chuh na susie a. Amau haw hetzingna nasan in a bei mang ta ngâl a.

⁷LALPA vang chuh kumlekhuo a dingin lal in a chu a: A lalchutphah vaihawmna dingin a guonggalh tai.

⁸A mah chun khawvel hi diktat takin vaihawm sak intin, Uoh chuom neilo in mitin chuh vaihawm sak in a.

⁹Khutichun LALPA chuh nuoisiehna thuokte ding chun kulh insang a na hi’n a. Lungkham hunlai inle kulh insang ahi a;

¹⁰Khutichun na min hete chun a ginnau chuh nang ah a ngau a, Nang vangin chuh, LALPA, nangmah hawlte chuh na taihsan puoh ngâl a.

¹¹Zion a um LALPA chuh pakcha’n la sau inla: Mi haw lak ah chun a thilhih haw chuh hilh un.

¹²Thisan suoh, suohsalh zel sek pa chun amah chuh a ngaihtuoh ngâla: Mi gimtheite kiko thawm chuh a hengilh kha puoi.

¹³Aw LALPA ka chungah zahngai inla; Thihna kawtkhak apat a ei kaidawk sek pa Ei mudahte zieka ka lungkham na hi entie;

¹⁴Nangmah pahchak na chengcheng chuh ka hetsak theihna ding in; Zion chanu kawtpi haw achun, Nei hukdamna a hin lawp ing ka.

¹⁵Namtin chuh a kawkhuk siem u achun a tum u a; A lên zak gûk u a chun amau haw keng ngêi a âwk ta a.

¹⁶LALPA chuh a kiphuonga vai a hawm ta a, Mi dukdaklo chuh amah khutsuok ngêi chun a âwk sak a. Selah. (Higgaion hi ngaihtuoh tihna ahi)

¹⁷Minunsie te chun Sheol zuon un tin, Nam Pathien hetngilh te chengcheng chu tawh.

¹⁸Chagah te chuh hetngilh in um zing diek puo’n au, Gimtheite kinepna chuh kumlekhuo’n bei diek puo’n a.

¹⁹Aw LALPA, tho inla; mihing in guolzo kiu hen; Namtin chuh na masang ah vaihawm sak in um u hen.

²⁰Aw LALPA, amau haw chuh sulau inla; Namtin in mihing mai ahiu hi tih kiheu hen. Selah