Read Gangte SAM 90 Bible Online

SAM 90 - Gangte bible

SAM 90

¹LALPA, nang chuh suon chengcheng chana ka um nau na hi a,

²Tangte pien ma a, Leichung khawvel na phuhdawk man le, Kumsawt apat kumsawt chan inle nang chuh Pathien na hi.

³Nang chun mihiem hi leivui ah na vaihkit sak seka; “Mihiem chate haw, vaikit un,” na ti seka.

⁴Nang ngaih chun kum sangkhat hi, Thangni bei ta bang phet kha ahi ngâla. Zan venkhat sung bang phet mah ahi.

⁵Amau haw chuh tuilien bangin na tawh mang sak seka; Khang khat ipmu tawbang phet ahiu hi: Zinglam a hampa dâwn dawk bang phet ahiu hi.

⁶Zinglam chun a hung duoh in a hung dâwn dawka; Nitâk lam chun ât puk in a uma, a vuoi sek hi.

⁷Na lungnat na a hih beimang in ka um a, Na lungnat na a hih lungkham in ka um sek ngâl u a.

⁸Ka mantheihlohnau haw chuh na masangah na kawih a, A gûka ka gitlohna hawu chuh na melvak ah na kawih ta a.

⁹Ka damlai uh ni chengcheng hi na lungnat na’n a bei sek a; Ka damlai uh kum haw hi thusim bangin ka hih tâwp sek ui.

¹⁰Ka damlai uh kum haw chuh kum sawmsagih ahi a, Hatna ziekin kum sawmgiet le ahi thei a; Himahlele a sawt na chuh sepgimna leh lungkhamna mai ahi; A bei pai a kei haw le ka leng mang zel sek ui.

¹¹Kuo a na lungnatna thilhih theih zie ngaihtuoh a, Nangmah kihchak ding dân banga na lungnat na chu he thei ding?

¹²Ka damlai uh niu haw sim dan ding ei sinsak inla, Chitna lunggil ka neih lawh hiel theih na ding un.

¹³Aw LALPA, hung kihei inla; bang chan lungnat guo na him? Na sawntawlawi chung ahin na lainatna sulang in,

¹⁴Aw, zingkal in na zahngaihna’n ei tai sak inla; Ka damlai chan u a ka lawp u a, ka kipâk theih na dingun.

¹⁵Nang in nei hih gimtheih ni haw guol mah in kei uh ei sukipak in, Thil phalo ka tuok kum sung hun teu bang khan.

¹⁶Na nasep chuh na sawntawlawi haw kawmah kilang hen la, Na lopina thilhih theihna chuh a chateu kawmah lang hen.

¹⁷Chun, LALPA ka Pathien uh deihsakna chuh ka chung uh ah um hen la, Ka khut nasep teu chuh kei u a dingin vangsak inla; Ahi, ka khut nasep hawu hi vangsak in.