Read Gangte SAM 94 Bible Online

SAM 94 - Gangte bible

SAM 94

¹Aw LALPA, nang phuba la Pathien, Nang phuba la Pathien, salhvak inla,

²Nang leichung a vaihawmpa kipan inla: Kisathei te chuh a gitloh man uh din in.

³LALPA, minunsie te chun bang chana? Minunsie te chun bang chana a kichawihsang ding uh?

⁴Amau chuh a kisathei u a, chapo takin thu a gen u a; Thil hihkhiel haw chengcheng chuh a kipakcha kawm sek u a.

⁵Aw LALPA, na mite chuh a sugawp sek u a, Na gochan chuh a sugimthei sek ui.

⁶Meithai leh malzinte chuh a that u a, Pa neilo haw chuh a that sek ui.

⁷“LALPA chun mu puo’n tin, Jakob Pathien in ngaihtuoh chuom puo’n a,” a ti sek ui.

⁸Mi laka mingawl te haw, ngaihtuoh tiem u! Mingawl haw, bangtik leh ching ding na hiu hi?

⁹Bil bulhpa chun za lo ding ahim? Mit siempa chun mulo ding ahim?

¹⁰Namtin a thu a hêi pan hilhgaih lo ding ahim? Mihiem chitna sinsakpa chun thunun lo ding ahim?

¹¹LALPA chun mihiem ngaihtuoh haw chuh, Bangmahlo maimai ahi tih a he a.

¹²Aw LALPA, mi na thunun a, na dân thu na sinsakte chu a hamphau hi.

¹³Minunsie dinga kawkhuk laih a a um ma cheng, Lungkham nite apan a na chawlhsak theih na dingin,

¹⁴LALPA chun a mite hengilh ding ahi puoh ngâl a, A gochan chuh taihsan diek puo’n a.

¹⁵Vaihawmna chuh diktatna lam ah vaikit intin; Chun, lunggil diktak pu chengcheng chun zie chu zui un au.

¹⁶Kuo a thil phalo hih haw ei do sak dinga kipan ding? Kuo a thil hihkhiel te ei do sak dinga ding ta ding?

¹⁷LALPA chuh ei panpihpa hi kile chuh, Ka hinna hi kintak in mun thip a um ding ahi ta a.

¹⁸“Ka kalsuon a teu hi,” ka tih khan, Aw LALPA, na chitna chun nei kaitho a.

¹⁹Ka lungthima ngaihkhawk tampi ka neih lai chun, Na thamuonnate chun ka hinna hi a sukipak sek hi.

²⁰Vaihawmtu nunsie takte chun hun kichampih ding ahiu hi? Amau chun dawha thuk takin dân a siem sek ui.

²¹Mi diktat te hinna suol guo’n a kipunkhawm sek u a, Mawhna neilo chuh thiemloh a chan sak tei tei sek ui.

²²Himahlele LALPA chuh ka insang a na hi; Ka Pathien chuh ka kihumbitna suongpi a na hi a.

²³Amah chun amau haw gitloh na ngêi chuh a chung u ah a kiek sak a, Amau haw phatloh na ngêi chun hih mangthai ina. LALPA ka Pathien u chun amau chuh phiet mang ina.