Read Gangte SAM 95 Bible Online

SAM 95 - Gangte bible

SAM 95

¹Aw hung tiem u, LALPA chawiân in lawp takin la sa dii tiu; I kihukdamnau suongpi chawiân in lawp takin kiko hitiu.

²Kipah thugen kawmin a masang ah chieh dii tiu ie, Pahchakna la sa a amah chawiân in lawp takin aw suoh hitiu.

³LALPA chuh Pathien lopi tak ahi ngâla, pathien chengcheng chunga Lal lopi tak ahi.

⁴Amah khut achun lei mun thuk tak haw a um a; Tangsip sang tak haw nasan in amah a ahi ngâla.

⁵Tuisuohgiet hi amah a ahi a, amah siem ahi; Gam gaw hile a khut suok ahi.

⁶Aw hung unla chibai bûk in kûn hitiu ie; LALPA ei siempa masangah khupdin hitiu:

⁷Amah chuh I Pathien uh ahi a, Eihaw hi a gan tatna muna mite leh a khuta belamte I hi ngâl u a. Tuni hin a aw na za thei kha mai zên leu chin chu aw!

⁸“Gamthip a Massah nihaw guol leh Meribah a ahih guol u khan, na lunggil uh hih khauh kiu in,

⁹Zielai chun na suonteu in ei patep u a, ka thilhih chu mu mahleu ei enchien u a;

¹⁰Kum sawmli sung hiel zie suon haw chung achun ka lungkim puoh a, ‘A lunggil u a ngaih khelh hât mi ahiu a, Ka lampi le a ngaihsak puou,’ ka ti a.

¹¹Zieziekchun, ka chawlhna a chun lut hiel puo’n au,” ti a lungna taka kihâksiel ka hi.