Read Gangte SAM 96 Bible Online

SAM 96 - Gangte bible

SAM 96

¹Aw LALPA chawiân in la thak sau inla: Leichung luoh cheng chengte, LALPA chawiân in la sau in.

²LALPA chawiân a lasa’n, Amin pakchau inla, Nicheng in a hukdamna thu chuh hetsak un.

³Namtin lak ah a lopi zie sulang unla, Mi cheng kawmah a thilmak hih haw chu phuong un.

⁴LALPA chuh a lopi a, nasa taka pahchak ding ahi; Amah chuh pathien chengcheng sanga kihchak ding ahi.

⁵Mipi haw pathien chuh milim haw poh ahi ngâla: Himahleh, LALPA vangin chu van haw khu a siem ahi.

⁶Limbawlna leh lopina a masang ah a um a: Hatna leh hawihna chu a munthiengtho ah a um hi.

⁷Mitin a chitin cheng te haw, LALPA chu pieu inla, LALPA chuh lopina leh hatna pieu in.

⁸LALPA min chuh lopina leh hatna pieu unla: Thilpiek hun chawi in a Ho-In huongsung achun hung lut un.

⁹Aw thiengtho kilawmna silh in LALPA chuh ho unla, Leichung luoh cheng chengte haw a masang ah kilîng un.

¹⁰Namtin laka chun, “LALPA chuh lal in a chûi,” tiu in: Khawvel hi a phuhdet ahi a, kilîng ngei puo’n a: Amah chun khenchuom neilo in namtin vaihawm ina.

¹¹Van haw khu kipâk tak in um u henla, lei hile lawp takin um hen; Tuisuohgiet leh a sunga thil um chengcheng hi gi lul lul u hen;

¹²Gam leh a sunga um chengcheng hi kipâk takin um u hen; Zie tieng chuleh gamnuoi a thing chengcheng hin LALPA masang ah lâwpin lasa’n au;

¹³Amah chuh hung ding ahi a, Lei vaihawm dingin amah chuh hung ding ahi ngâla: Khawvel chuh diktak in vaihawm sak intin, Mi cheng cheng a thutak in vaihawm sak ding ahi.