Read Gangte THUCHINGTE 1 Bible Online

THUCHINGTE 1 - Gangte bible

THUCHINGTE 1

¹Israel leng David chapa Solomon thuching haw chuh:

²Mite chun pilna leh sinsakna he ding leh, thu umzie haw hethiem dingin;

³Thilhih ching taka kisinsakna dawng dingin, kitûpna leh vaihawmna leh khenchuom neih lohna leh,

⁴Mimawlte kawma chitna pie ding leh; khangdawngte kawma chitna leh lam dik hetthiemna pie dingin.

⁵Miching te chun le a het u a, thiemna a chuh a pun beh theihna dingin leh, hetthiemna nei mite chun vaihawmna dikte chuh a chan theihna dingun.

⁶Khutia chuh thuching leh a umzie hethiem ding leh, miching te thu leh a thu kisel te chuh a het theihna dingun.

⁷LALPA kihchak chuh hetna bulpi ahi. Himahleh mingawl chun chitna leh kisinsakna chuh a musit hi.

⁸Ka chapa, na pa hun sinsakna chuh ngaitha’n la, na nu thupiek chuh kiheimangsan ki’n.

⁹Na luchang a ding chun pakchakhi hawihtak hi’n tin, Na ngâwng kimvela chun khi bangin âwk in.

¹⁰Ka chapa, migilote’n a hun thep u chun lem sakpih zieng ki’n la.

¹¹“Keihaw kawmah hung inla, thisan suoh hiting un; a ziek um lo in mi pawi khawih lo a gûkin châng hi tingun,

¹²Sheol bangin a hingsan in valh zo hi tingun, mi kitûpte sheol a chieh suk bang mai in;

¹³thil mantam haw chuh mui tingun, I inteu chuh gâllâk thil haw chun sudim hiting un;

¹⁴na chanvo chuh keihaw lak ah kawih inla, sumbawm kikawp hitiu,” ti leu le.

¹⁵Ka chapa, amau haw chuh lampi ah kitawnpih ki’n la, a lampiu apat chuh kivêng pha’n.

¹⁶A kengteu chuh gitlohna lam ah a suon hât u a, thisan suoh dingin a kisazo zing ngâl u a.

¹⁷Vacha haw mitmuha lên zak palh chuh, a thâwn kei ahi ngâl a.

¹⁸Chun, a gûka thisan suoh te chun, amau hinna ngêi chule a gûka kichan ahiu hi.

¹⁹Lawkna dinga misuomte lampi chuh zie tawbang chuh ahi a zie ngêi chun a neite hinna chuh a lâkmang sak sek hi.

²⁰Pilna chuh khawlai achun ngeih tak in a kiko a, khawlai haw achun a aw chuh a suoh a.

²¹Khawlai mun pawimawhna mun achun a kiko a, khawpi lutna kawtkhakhaw achun a gen sek a, khawpi sung achun thu a gen sek hi.

²²Bang chan ahim nang haw mimawlte haw, mawlna hi na hehpih zing ding uh? muhsit chîngte chuh a mi muhsitnau achun kipâk in, mingawlte chun bang chan ahim hetna chuh a deihloh naklai dinguh?

²³Ka hun hilhgaihna hi ngaithau inla, kithu-hilhna pha chuh hun pie’ng ka ting, ka thu chuh nang haw hun hetsak ing ka.

²⁴Ka hun sama, na ngaitha nuom puou a, ka khut ka zaka kuoma’n na ngaihsak nuom puou hi.

²⁵Ka thuhilhna te na kihetmawh sak u a, ka hun hilhgaihna khatchale na ngaihsak puou hi.

²⁶Keile na lungzîn niu leh nui ing ka ting, Na lauhnau a hungtun phat chuleh hun êngho ing ka.

²⁷Na lauhnau chuh huihpi bang leh, na lungzînna chuh chinpei bangin hung intin; Gimtheihna leh lungzînna na chung u a a hung tun tieng,

²⁸Kei ei hun sam un na tin, himahlele hun dâwng puo’ng ka; gunchuh takin ei hawl un na tin, himahlele ei mu puo’n lau.

²⁹Aziek chuh, hetna chuh a deih puou a, LALPA kihchak chuh a tel zawk loh ziekun.

³⁰Ka thuhilh haw khatchale na zawp puou a, ka hilhgaihnate chengcheng chuh na muhsit ziekun.

³¹Zieziekchun, na tuh gahteu ngêi chuh neu in na tin uh, na thilhih guot hawu ngêi chun suknat in um inlau.

³²Mimawlte chiehkhelh na chun amau chuh thih lawh untin, mingawlte nawpsak bawlna chun amau chuh susie ding ahi ngâl a.

³³Amahvang chuh kuole ka thu ngai ta chuh bit takin cheng untin, sietna lau lo in um hiet hiet in au.