Read Gangte THUCHINGTE 11 Bible Online

THUCHINGTE 11 - Gangte bible

THUCHINGTE 11

¹Tehna diklo chuh LALPA mitmuh in thil kihdak-um tak ahi a, himahleh, dik taka teh vang chuh a kipahlam tak ahi.

²Chapona a hung um tieng leh zahchâkna’n a zui seka. Kingainiemte kawm achun pilna a um sek hi.

³Mipha chuh a lungthim phatna chun pui intin; himahleh, mi ginumlote vang chu amah ginum lohna chun suksiet in um in au.

⁴Thihna na tuok ni chun sumlepai in phatchuomna nei puo’n tin; himahlele ginumna chun na hinna hukdawk in a.

⁵Mi diktat kitûpna chun a lampi ding kâwkmuh intin; himahleh mi dukdaklo chun amah sietna tun in a.

⁶Mi diktat chuh amah ginumna chun hukdawk intin, mahleh, mi ginumlo vang chu amah duh-âmna chun man in a.

⁷Mi dukdaklo a thih tieng chuleh a kinepna chuh bei intin, Pathien helote kinepna chuh bangmah lo hi’n a.

⁸Mifel chuh lungkhamna apat lâkdawk in a um a; mi gilote chuh buoina achun kipei lut un au.

⁹Pathien ngaihsaklo mi chun a kam in a invengte a sumangthai a; himahleh, mi fel vang chuh hetna ziekin hukdawk in um in a.

¹⁰Mifel te’n vangphatna a chan niu chun khawpi chuh a kipâk a; himahleh, mi gilo a thih tieng chuleh kipahna thawm a um sek.

¹¹Mifel vangsaka a umna chun khawpi chuh a zemhawih a; himahleh, mi gilote kam vang chun khawpi a susie sek hi.

¹²A inveng musitte chun pilna a tasam a; hetna neite vang chuh thipkêi in a um sek.

¹³Mi kamtam vakvielte chun thuguk a gendawk sek u a, himahleh, lungthim a mi ginum chun thu a îm sek hi.

¹⁴Lemguotthiem umlohna achun mipite a gammâng u a; himahleh, lemguotthiem tamna achun bitna a um sek hi.

¹⁵Gamdang mite bat piek sak dinga na kitep chun buoi in na tin; himahleh, na kitep loh chuh nang dingin pha zawn a.

¹⁶Numei nunnem chuh zah in um intin; hi mahleh, phatna deihlo vang chuh muolphona’n khuh ina.

¹⁷Zahngai thei mi chun amah hinna dingin thilpha a hih sek a; mahleh, mi gilo chun vang amah taksa ngêi a suna sek hi.

¹⁸Migilo chun thepna gah a lo sek a; hi mahleh, felna gah tuhte vang chun kipahman diktak mun au.

¹⁹Felna a ding det mi chuh hing untin; mahleh, gitlohna delhzuite chun vang thihna ding ngêi in a delh uh ahi.

²⁰Lungthim phalo nei mi chuh LALPA dingin kihdak-um tak ahi a; mahleh, diktaka thilhih vang chuh a kipahlam tak ahi.

²¹Migilo chuh gawt loh in suokcha puo’n tin; himahleh, mi diktat chuh suokcha’n a.

²²Numei melhawih ngaihtuoh thiemna neilo chuh, vawk naka sana khi awhsak tawbang ahi.

²³Mifel duhthusam chuh thilpha ngên ahi sek a, mi gilote kinepna vang chuh lungnat na mai ahi.

²⁴Phal taka pie a, pung deuh deuh a um a, a hawp zak ding banga hawmzaklote chun chatgahna tuok un au.

²⁵Mi thilphal chuh sukhauhsak in um intin; mi dang panpih chu amah le panpih in um in a.

²⁶Buh itte chuh mi’n hansie buokkhum untin; himahleh, a zuokte luchang vang chu vangsak in um in a.

²⁷Phachuomngai taka thilpha hawl chun deihsakna a hawl a; mahleh, thil phalo hawlte chung achun sietna tung in a.

²⁸A hauhsakna kimuonpihte chuh puk untin; himahleh, mi diktatte vang chuh hamhing guolin duoh in au.

²⁹Mi a insung subuoi chuh huih guolin beimang in tin; mingawl chuh mipilte suok in um in a.

³⁰Diktatna gah chuh hinna thing ahi a; kuole, thagau man chuh mipil ahi.

³¹Ngaitie, mi diktatte chuh leisiet a hi kipahman piek a hih chun; minunsiete leh thil hihkhielte chuh gawt in a umna lâwm lâwm dingu e!