Read Gangte THUCHINGTE 13 Bible Online

THUCHINGTE 13 - Gangte bible

THUCHINGTE 13

¹Chapa ching chun a pa thuhilhna a khawksak sek ahi, himahleh, muhsit chîng mi chun vang hilhgaihna a ngainep sek hi.

²Mi’n a kam apat thilpha gah chuh nen tin, himahleh, mi phalote chun vang pawngbawl a utcha sek ui.

³A kam vengpha chun a hinna a humbit sek a, mi kamzau chun vang manthaina tuok in a.

⁴Mi thadah lungthim chun thil a deih ngêi a, ahin la bangmah a nei diek puoi. Mi taima lungthim vang chuh kipâk takin a um sek hi.

⁵Mi ginum chun zuou a haw a, himahleh, migilo vang chuh kihdak a um a, muolphona a tun sek hi.

⁶Mi diktat chuh a diktatna’n a veng sek a, himahleh, gitlohna chun vang mi gilote a supuk sek hi.

⁷Bangmah neilo hausa kisa tak a um a, hausa mah mah ngâl chagah kisa tak le a um kit hi.

⁸Mihing hinna tatna chuh a hauhsakna ahi a, himahleh, mi gimthei ten vauna a ngaihsak puou hi.

⁹Mi diktat vak chuh kipahna ahi a, himahleh, migilo meivak vang chuh sukmit in um in a.

¹⁰Chapona chun kinakna a tun a, himahleh, thuhilhna phatak a zawp vang chuh pilna ahi.

¹¹Baihlam taka sum muh chuh mangthai pai intin, himahleh, haksa taka muhdawk vang chuh pung deuh deuh in a.

¹²Kinepna suksieta um chun lungthim a suna a, himahleh, duhthusam guitung vang chuh hinna thing ahi.

¹³Thuhilhna khawksalo taphawt chun amah chungah sietna kitun in tin, mahleh, thuhilhna zuite vang chuh kipahman piek hi’nau.

¹⁴Mi pil sinsakna chuh hinna tuikhuk ahi a, thihna thâng apat suohchakna ahi.

¹⁵Hetthiemna pha chun deihsakna a pie a, himahleh, mi ginumlote lampi vang chuh manthaina ahi.

¹⁶Mi lemhe chengcheng chun pilna mang in a sem u a, himahleh, mi ngawlte vang chun a ngawlnau a thehdalh sek ui.

¹⁷Palai ginumlo chun buoina a tun sek a, himahleh, palai ginum vang chuh thamuonna atun hi.

¹⁸Hilhgaihna deihlote chung achun chatgahna leh muolphona tung intin, mahleh, hilhgaihna ngaisang mi chun vang zahna dawng in a.

¹⁹Duhthusam sukbukim a um chuh hinna a dingin a thum a, himahleh, mi ngawlte ding chun gitlohna taihsan hi kihdak-um ahi.

²⁰Mi pil na kivawppih chun, nang le hung pil in na tin, himahleh, mi ngawl na kivawppih vang chun gimtheihna thuok in la.

²¹Vangsietna chun mi gilote chuh a zui zel a, himahleh mifel vang chuh thilpha a vangsak in um in au.

²²Mi pha chun a tute chana dingin go a nusieh sek a, himahleh, mi gilote hauhsakna vang chuh mi dikte dinga khawlkhawm ahi.

²³Mi chagahte lo haw chun nek ding tampi a suoh a, himahleh vaihawmna dikloh ziekin kaih loh in a um sek hi.

²⁴Mawlh mang lo mi chuh chapa lungsiet lo ahi a, himahleh, a lungsiette vang chun taima takin a thunun sek ui.

²⁵Mi diktat chun deihkham seta nek ding a nei a, himahleh, migilo gilpi vang chun deihkhawp mu puo’n a.