Read Gangte THUCHINGTE 15 Bible Online

THUCHINGTE 15 - Gangte bible

THUCHINGTE 15

¹Dawnna nem chun lungnatna a sudai a, himahleh paukam zakdah um vang chun lungnatna a chawktho hi.

²Mipil lei chun pilna thudik a gendawk sek a, himahleh, mingawl kam chun vang zahchâk um thilte a siet dawk sek hi.

³LALPA mit chuh muntin ah a um a, thilpha leh thil sie chuh a mu zing sek hi.

⁴Kampau nem tak chuh hinna thing ahi a, himahleh thu meinei vang chun lungthim a susie sek hi.

⁵Mingawl chun a pa thununna chuh a ngainep sek a, himahleh hilhgaihna khawksa mi vang chun pilna a nei sek hi.

⁶Mi diktat In achun neihlelam tamtak a um a, himahleh mi nunsiete punna vang chuh buoina ahi sek hi.

⁷Mi pil mûk chun hetna a hawmzak a, himahleh mi ngawlte vang chuh a khuti puou hi.

⁸Mi nunsiete kithawihna chuh LALPA dingin kihdak-um ahi a, himahleh miphate pauchamna vang chuh a kipahlam tak ahi.

⁹Mi gilote lampi chuh LALPA dingin kihdak-um ahi a, himahleh diktatna lampi hawhte vang chuh a hehpih sek hi.

¹⁰A lampi kiheimangsante chun thununna haksa tak thuok untin, hilhgaihna khawksa lote chuh thi’n au.

¹¹Thihna khawvel chun LALPA hetloh dingin bangmah a vawp thei puoh a; mihing in bangti’n a a ngaihtuohte chuh Pathien apat a a selguk theih ding?

¹²Muhsit chîng mi chun hilhgaihna a deih puoh a, mipilte kawm achun le thuhilhna a la nuom diek puoi.

¹³Lungthim kipâk chun mel a tai sak a, himahleh lungthima lungkhamna chun lunggil a suna sek hi.

¹⁴Hetthiemna lunggil neite chun hetna a hawl sek u a, himahleh, mingawl kam vang chuh lepchieh in a kivâk sek hi.

¹⁵Gimtheihna thuokte ding chun ni cheng hi ni phalo ahi a, himahleh lungthim kipâk mi vang chun guolvak a siem zing hi.

¹⁶Buoipih um taka hauhsak sang chun, LALPA lau kawma tawmcha neih chuh a pha zawi.

¹⁷Kilungsiet diel diel a ancheh meh chuh, kihotheilo hiela bâwngchal thau tak kithah sang chun a pha zawi.

¹⁸Mi lungchawm chun kinakna a tun sak a, himahleh, mi lungnieng chun vang kinakna a sudai sek hi.

¹⁹Mi thadah lampi chuh lingnawk in dim intin, himahleh mi diktat lampi vang chuh lamlien phei tawbang ahi.

²⁰Chapa pil chun a pa kipahna a siem a, himahleh mingawl chun vang a nu a musit sek hi.

²¹Ngaihtuohna neilote chuh ngawlna hi a kipahnau a hi a, himahleh hetthiemna neite chun vang a lampiu a siem hawih sek ui.

²²Thil guonggalh thiem um lohna achun thil guonggalh haw chuh a lawhsam sek u a, himahleh lemguotthiem tamna achun lawhtitna a um sek hi.

²³Dawnna dik chun mi a sukipak a, a hun dik taka thugen chuh bang tienga pha ahi ta’m!

²⁴Mipil lampi chuh chunglam zuonin a chieh to a, nuoi lama thihna khawvel chuh a taihsan theihna dingin.

²⁵LALPA’n mi chapote In chuh hihsie’n tin, himahleh meithaite gamgi chu vang vengbit in a.

²⁶Mi nunsiete ngaihtuohna chuh LALPA ding chun kihdak-um ahi a, himahleh lungthim thiengtho vang chuh a kipahlam tak ahi.

²⁷Diklo taka lawkna chun amah insung a subuoi sek a, himahleh gawlhgukna deihlote vang chuh lawhting in au.

²⁸Mi diktat chun dawnna a piek man phatak in a ngaihtuoh a, himahleh migilo kam chun vang thil phalo a gendawk sek hi.

²⁹Mi phate pauchamna chuh LALPA’n a ngaitha sek a, himahleh mi gilote pauchamna chu vang a he sek puoi.

³⁰Maitaina chun lungthim a sukipak a, chanchin kipah-um chun guh a suhisel sek.

³¹Hilhgaihna ngaihsak mi chuh, mipilte lak achun tel in a.

³²Sinsakna musitte chuh amau leh amau kimusit ahiu a, himahleh hilhgaihna pawm thiemte vang chun hetna nei in au.

³³LALPA kihchak na chuh pilna kisinsakna achun a um a, kingaihniemna chuh limbawla umna ahi.