Read Gangte THUCHINGTE 16 Bible Online

THUCHINGTE 16 - Gangte bible

THUCHINGTE 16

¹Lungthima guonggalh lawkna chuh mihing a ahi a, a sukpitinna vang chuh Pathien apat ahi.

²Mihingte lampi cheng chuh amau mit ah a thiengtho vek a, himahleh LALPA chun vang lungthim a bûk sek.

³Na nasep cheng chuh LALPA kawmah pien la, tichun na thil guonggalh haw chuh hun sukpitin sak in a.

⁴LALPA’n thil chengcheng hi tup nei chietin a siem a, mi gilote nasan le buoina ni a dinga guot ahiu hi.

⁵Kuole, mi chapo chuh LALPA dingin kihdak-um ahi a, kithutuok mahleu le gawt loh in suokcha puo’n au.

⁶Hehpihna leh thutak chun manlohna chuh sawp thien ahi a, LALPA a kihchak ziekun min gitlohna a taihsan sek ui.

⁷Min a umdan a LALPA a sukkipah chun a melmate nasan le guolpha’n a siem sek hi.

⁸Diklo taka tamtak neih sang chun, dik taka tawmcha neih chuh a phazawi.

⁹Mihingte lungthim chun a lampi ding a guonggalh sek a, himahleh, a kalsuon vang chuh LALPA’n a pui sek.

¹⁰Leng mûk achun Pathien apat a thupukna chuh a um seka, a thutanna siem chuh a dik sek hi.

¹¹Bûkna dik leh tehna dik chuh LALPA a ahi a, dip sunga bûkna chengcheng chuh amah a ahi.

¹²Diklo taka thilhih chuh lengte a dingin kihdak-um ahi a, lalchutphah chuh dikna a sukdet ahi ngâl a.

¹³Leng chun thudik gente chuh a kipahpih u a, thudik gente chuh a deihchuom sek ui.

¹⁴Leng lungnatna chun mi a thih lawh sek a, mi pil chun zie chuh a sudai sek hi.

¹⁵Leng mel chuh a kipah leh hinna a um a, a deihsakna chuh guohtui kiek nunga meipi bang ahi.

¹⁶Pilna neih chuh sana sangin a phazaw a hetthiemna neih chuh dangkaguo sanga tel zawk ding ahi.

¹⁷Mi phate lampi chuh gitlohna taihmang san hi ahi a, mi a lampi vengphate chun a hinnau a hukbit sek ui,

¹⁸Chapona chuh sietna masangah a chieh sek a, lunggil uong chuh pukna masangah a chieh sek hi.

¹⁹Mi chapote tawh gâllâk sum kihawp sang chun, mi chagahte tawh lungthima kingainiem taka um chuh a phazawi.

²⁰Gunchuh taka thu ngaithate chun thilpha muu intin LALPA gingcha taphawt chuh a kipâk sek ui.

²¹Lunggil a pil chuh mi lemhe ti a het hi’n tin, kampau thum tak chun mi thuzawhna a supung sek hi.

²²Pilna hi a neite ding chun hinna tuinak ahi a, himahleh, mingawlte ding chun gawtna chuh ngawlhuoi ahi.

²³Mipil chun thugen ding a ngaihtuoh khawl masa sek a, a gendawk tieng chuleh mi a thuzawh diek sek hi.

²⁴Thu kipah-um chuh khuoizu tawbang ahi a, lungthima dingin a thum a, taksa a dingin hiselna ahi.

²⁵Mihing a dinga lampi dik hileh kilawm tak a um a, himahleh a tawpna chuh thihna ahi.

²⁶Nasemte chuh a gilkielna chun a sepgim saka, a gilkielna chuh suktai a guot ziekin.

²⁷Miphalo te chun midang le suknatna ding a hawl u a, a kam u a thu pawt te chun, mei guolin a katum sek hi.

²⁸Migilo chun kinakna a thehzak sek a, kihoguk chîng chun guolpha lai a sukhen sek.

²⁹Minunsie chun a invengte a kinak saka, zie chun lampi diklo ah a pui sek hi.

³⁰Mit sik-ât chîng mi chun thil phalo ngaihtuoh a, a neh petchak kei a thugen chun thil phalo a gen dawk sek hi,

³¹Sam kâng chuh lopina lallukhuk ahi a, damsawtna hi mi diktatte kipahman ahi.

³²Thilhih theihna sangin lungnat vakloh a pha zaw a, eimah kithununna chuh khawpi zawh sangin a phazawi.

³³Mi’n a pheichung ah phun a san sek u a, himahleh a dawnna vang chuh Pathien apat ahi.