Read Gangte THUCHINGTE 17 Bible Online

THUCHINGTE 17 - Gangte bible

THUCHINGTE 17

¹Kisuol buoi lui luia guolvak siemna In sang chun, kituok diel diel a ankhing nekna In chuh a pha zawi.

²Suok pilvang taka nasem chun, a pu chapa dukdaklote chunga chun vaihawm intin, insung mite laka chun gochan nei in a.

³Hâltuina bel chuh dangkaguo a ding ahi a; hâltuina mei chuh sana a ding ahi, himahleh LALPA chun lungthim a enchien sek hi.

⁴Miphalote chun ngaihdan phalo a ngaitha sek u a, mi zuou te chun zuou thu a ngaitha sek ui.

⁵Mi gimthei musitte chuh a Siempa musit ahiu a, mi vangsietna chawhsate chu gawt loh in um puo’n au.

⁶Tu leh chate hi teksiete lallukhuk ahiu a, chapate lopina chuh a pate ahiu.

⁷Thu phatak gen leh mingawl a kimeh puoh a, zuou gen chuh leng chate tawh a kilawmlo zawsem hi.

⁸Gawlhgukna hi a piepa mit achun dawi suong tawbang ahi a, thil chengcheng hihthei dingin a gingcha a.

⁹Mi gitlohna ngaidam chun lungsietna a hawl sek a, gitlohna hezingte vang chun guolpha a sukhen sek ui.

¹⁰Mingawl zakhat vei zêp sang chun, mi pil khatvei hilhgaih chun a he tam zawi.

¹¹Migilo chun buoina mai a sudawk a thihna palai ningkhel tak guolin a chungah hung tung in a.

¹²Mingawl a ngawlna a puon lai tak kituokpih sang chun savawm a no kilaksak zo pan kituokpih chuh nawp a um zawi.

¹³Kuole, thilpha thil phalo a dinthuk te chuh, sietna’n a In chuh pawtsan ngei puo’n a.

¹⁴Kinielna kipatna chuh tui sunbuok tawbang ahi a, zieziekchun kinakna atunma chun kiniel chuh haihsan in.

¹⁵Migilo thiemchan sak leh mi dik thiemloh chansak chuh, LALPA a dingin a kihdak-um dân akibang hi.

¹⁶Zil ding lungthim le neilo mingawl khuta chuh bang zieka thiemna chawkna dinga paisa kikawih ding ahim?

¹⁷Guolpha chun bangtik lai in le a lungsiet a, chun, inkuon kinaihpihte hi lungkhamna thuokpih dinga pieng ahi,

¹⁸Hetthiemna tasam chun kin takin kitiemna suoikai in, a invengte sum bat chungah mawh a puo sek hi.

¹⁹Kuole dân bawhsiet ut mi chun kisuol a utcha sek a, a kawtkhak dawmsang chun manthaina a hawl sek hi.

²⁰Lungthim kawite chuh hausa ngei puou in tin, lei lepchiehte chuh sietna khuk ah a kielut un au.

²¹Chapa ngawl chun a pa lungkhamna a tun a, chapa ngawl neipa chuh a kipâk kha puoi.

²²Lungthim kipahna chuh damdawi phatak ahi a, himahleh, lungthima gimtheihna vang chun guh a sungawt hi.

²³Vaihawm diklo chun gawlhgukna a la a, thudik a vaihawmna a susie sek hi.

²⁴Hetthiemna nei mi chun pilna lama chun a mit a hak a, himahleh mingawl chun vang kâwlmawng a en sek hi.

²⁵Chapa ngawl chuh a pa dingin lungkhamna ahi a, a pienna nu dingin gimtheihna ahi.

²⁶Mi diktat gawt chuh a pha puoh a, mipha, a thutak zieka zêp chuh le dikna hihsietna ahi.

²⁷A thugena kisûm thei chun pilna a nei a, lungthim dap taka gel mi chun hetthiemna a nei hi.

²⁸Mingawl le thipkêi a a um chun mipil a ngaih ahi a, a kam a hup zo te chuh hetthiemna nei a ngaih ahi.