Read Gangte THUCHINGTE 18 Bible Online

THUCHINGTE 18 - Gangte bible

THUCHINGTE 18

¹Mi dangte tawh kivawp theilo mi chun amah a ding mai a ngaihtuoh sek a, mi dang chengin dika a het u chuh a nielkalh sek hi.

²Mingawl chun hetthiemna achun kipahna a nei puoh a, amah ngaihdan gendawk mai tih loh chuh.

³Mi nunsie a hung tieng leh muhsitna’n a zui a, muolphona a um phat leh hilhgaihna’n a zui sek.

⁴Mihingte kamsuok chuh tuili thuk tak tawbang ahi a, pilna tuinak chuh luicha tuiluong lai bang ahi.

⁵Mi diklo deihsak chuh a pha puoh a, vaihawmna a mi dik thiemloh chansak chu le apha diek puoi.

⁶Mingawlte kam chun kinielna a pan sek a, a kam u chun zêpna mawlh a sam sek hi.

⁷Mi ngawlin a kamsuok chuh a thih pih seka, amah thugen ngêi achun a âwk sek hi.

⁸Mi hoguk thiemte thugen chuh buh lim tak tawbang ahi a, gilpi sunggil tieng hielin a lut sek hi.

⁹A nasep a mi zawmthaw chuh, amah susie dinga a inkuon nai ahi.

¹⁰LALPA min chuh kulhpi dettak a hi a, mi diktat chuh a tailut a a bit sek hi.

¹¹Mihausa ding chun a sum chuh a kulhpi ahi a, amah ding chun gâlven insang tawbang ahi.

¹²Mi lungthim chapo chuh manthaina masangah a chieh sek a, limbawlna masang achun kingaihniemna a chieh sek hi.

¹³Min, a ngaihthak masanga dawnna a piek chun, amah a dingin ngawlna leh zahchâkna ahi.

¹⁴Mihingte hinna chun natna chuh thuok hâm hâm in tin, himahleh, lungthim liem chuh kuo a thuok zo ding?

¹⁵Mipil chun a lunggil in hetna a mu a, mipilte bil chun hetna a hawl sek hi.

¹⁶Thilpiek chun kawt a hawng a, amah chuh miliente kawm achun a puilut sek hi.

¹⁷A thiemna thu gen masa chuh, a kilanpihpa’n a gen ma’n thiem in a lang sek hi.

¹⁸Âisân in kinielna chuh a subei a, Mi thunei tak tak kinielna chuh thutan sak ahi sek hi.

¹⁹Guolpha sukthasiet chuh kulhpi dettak sangin zawh a haksa zaw a, zie tawbang kinakna chuh thikdai tawbang ahi.

²⁰Mihing gilpi chuh a kamsuok chun sukdim in um intin a mûk a lawkna chun suklungkim in um in a.

²¹Lei thilhih theihna achun thihna leh hinna a um a, a mangte chun zie a pata gah chuh ne’n au.

²²Kuole zi mu chuh thilpha mu ahi a, LALPA deihsakna chang ahi.

²³Mi chagah chun nem takin a ngên a, mi hausa chun vang khauh takin a dâwng sek hi.

²⁴Mi khenkhat chuh guolpha guolin a kisiem u a, himahleh guolpha tak tak chuh inkuon kinaihpih pên sanga kinai zaw a um hi.