Read Gangte THUCHINGTE 2 Bible Online

THUCHINGTE 2 - Gangte bible

THUCHINGTE 2

¹Ka chapa, ka thute hi na pawm a, ka thupiekte hi nangmah a na khawlkhawm chun,

²Pilna lama na bil na dawh a, hetthiemna lama na lunggil na mat a;

³ahi, hetthiemna, sama na kiko a, hetthiemna sama na aw na suoh chun,

⁴dangkaguo banga na hawl a, go selguk banga na hawl chun;

⁵LALPA kihchak dân hun he ta’n na tin, Pathien hetna chuh hun mudawk ta’n la.

⁶LALPA chun pilna chuh a pie a, a kam apat chun hetna leh hetthiemna chuh a pawt ngâl a.

⁷Mi dikte ding chun pilna chuh a khawlkhawm a, lunggil phatak pute ding chun amah chuh phaw ahi.

⁸Amah chun vaihawmna lampi haw chuh a venbit sak a, a mithiengthote lampi chuh a vawpphat sak hi.

⁹Khutichun, diktatna, felna leh kihuihchuom lohna chuh hethiem tan na tin; ahi, lampi pha tin cheng chu tawh.

¹⁰Pilna chuh na lunggil a a hung lut tieng leh, na hetna chuh na thagau achun kipâk in a.

¹¹Ngaihtuoh thiemna chun nang chuh hun veng intin, hetthiemna chun hun umpih zing ding ahi.

¹²Mi gilote lampi apat a hun puidawk ding leh, thil manloh gente apat a hun puidawk dingin;

¹³thimna lampi hawh a, kitûpna lampi petsante akipat leh;

¹⁴thil gilo hih nuomsa mah mah te; mi manlohte, gitlohna a kipâk mah mah te,

¹⁵mi ngaihtuohna bukimlo te leh, a lampiteu petsan te a kipat chun,

¹⁶numei thanghuoi apat leh numei zawlsai thu zuou dangnal taka a gente lak apat chun hun hukdawk ina.

¹⁷Amahnu chun a ngaklak lai pasal chuh taihsan in, a Pathien kienga a kitiemna thiengtho chuh a hengilh ta ngâl a.

¹⁸A nungchang chun thihna lam a zuon a, a lampi chuh thihna lim ahi;

¹⁹A kawma chieh taphawt chuh kuomah a hung vaikit puou a, hinna lampi chuh a mu kit ngei ta puou hi.

²⁰Zieziekchun, mi phate lampi achun chieh inla, mi felte lampi chu hawh in.

²¹Mi diktat te chun gam chuh luoh untin, mi phabukimte vang chuh um zing in au.

²²Amahvang chuh minunsiete chuh leichung a kipatin lakdawk hiu intin, migukhah te chuh a zung puma bawhdawk in um in au.