Read Gangte THUCHINGTE 20 Bible Online

THUCHINGTE 20 - Gangte bible

THUCHINGTE 20

¹Zu hi nuihzatbuk ahi a, zukham chuh ngawlna ahi, zie a puihmang a umte chuh mipil lo ahiu.

²Leng lungnatna chuh sakeibaknei kitum tawbang ahi a, kuole, a sulungna taphawt chun a hinna chan ina.

³Kisuolbuoina lak apat a kikiengkawih thei chuh mi zahum ahi a, himahleh mingawl taphawt chuh a va pang sek ui.

⁴Mi thadah chun a hun takin lo kai puo’n tin, buh-ât hun leh bangmah nei puo’n a.

⁵Mihing lungthim ngaihtuohna chuh tui thuk tak tawbang ahi a, himahlele hetthiemna neite chun ladawk in au.

⁶Mitin in amau phatna leh ginumna thu gen untin, himahleh mi diktat chuh kuo a mu thei ding?

⁷Mi diktat chun dik takin kalsuon intin, amah suonte chuh mi hampha ahiu hi.

⁸Vaihawmna lalchutphah a chu lengpa chun thil phalo haw chuh a mitin a nawhmang sek hi.

⁹“Ka sie leh pha hetna chuh a thieng a, ka gitlohna cheng apat ka thieng hi,” kuo a ti thei ding?

¹⁰Bûkna diklo leh tehna diklo chuh LALPA mitmuh a kihdak-um chiet ahi.

¹¹Naupang haw nasan chuh a thilhih in a lungthim uh thientho leh dik dân a sulang sek ui.

¹²LALPA’n mit hi muhna ding leh bil hi ngaihthakna dingin ei pie gêl gêl a. LALPA siem gel ahi.

¹³Ihmut hi lungsiet ki’n, khutilochun hung chagah khan la, na mit hak inla, tichun nek ding tamtak nei inla.

¹⁴Thil chawte chun, “A pha puoi, a pha puoi,” a tiu a, himahlele a chiehmang tieng chuleh a ki-uonpih sek hi.

¹⁵Sana leh suong mantam tamtak a um a, himahlele, hetna suklatna mûk chuh sana tawbanga lul ahi.

¹⁶Gamdang mite bat chunga mawhpuo a kisiempa silhlechen chuh lân la, gamdang mite dinga kipiepa chuh kitiemna dingin hen in.

¹⁷A gûka chângthâk nek chuh a thum a, himahlele a nung leh kam achun pîlnel suong bangin dim in a.

¹⁸Thupiek ngaihsakte thil guonggalh chuh a lamzang a, chingthei taka thu hilhna chuh zui in galdo in.

¹⁹Holim duh chun thuguk a sulang a, zieziekchun mi kamtam chuh kipawlpih ki’n.

²⁰Anu ahim apa ahim hansiet chuh, thim sah tak laka a thaumei sukmit a um ding ahi.

²¹Kin taka hauhsakna khawlkhawm haw hi a tâwp lam leh vangsak in um khel puo’n a.

²²“Gitlohna chuh dinthuk ing ka” ti zieng ki’n la, LALPA chuh ngak inla, amân hun hukdawk in a.

²³Bûkna kibanglo haw chuh LALPA a dingin kihdak-um ahi a, a sauhlam tehna diklo hile apha puoi.

²⁴Mihingte kalsuon cheng hi LALPA guot ahi a, bangti’n I lampiu chuh I hechien thei ding u?

²⁵Kuo ahim chun “A thieng hi” a tih pai zieng chun amah a ding in thâng ahi a, kinlebuong a kipautiem zieng hi vainung leh kisikna ahi sek hi.

²⁶Leng chingthei chun thil hihkhielte chuh a mudawk a, lungsietna neilo hielin gawtna pien a.

²⁷Mihing thagau hi LALPA dingin meivak ahi a, sunggil lam thuk tak haw chuh a salhvak sek hi.

²⁸Zahngaihna leh thutak in leng chuh a vawp bit a, chun, leng chutphah chuh zahngaihna a tundin ahi.

²⁹Tangvalte lopina chuh a hâtnau ahi a, teksiete hawihna chuh a samkâng uh ahi.

³⁰Hilhgaih a zêpna chun thil phalo a suthieng a, zêpna chun sunggil thuk lam tak a khawih sek hi.