Read Gangte THUCHINGTE 21 Bible Online

THUCHINGTE 21 - Gangte bible

THUCHINGTE 21

¹LALPA chun leng lungthim chuh a thunun a, luicha tui luong bangin a ut dân dân in a pui kawi sek hi.

²Mihingte lampi chuh amau mitmuh in a dik vek a, himahleh LALPA’n lungthim a en sek.

³Kithawihna sangin diktak leh fel taka vaihawm chuh, LALPA a ding chun pawmtâk ahi zawi.

⁴Mi kingaisang, lungthim a chapo leh, Mi gilote nasep chuh gitloh ahi.

⁵Chingthei taka guonggalh chuh kiningtinna ahi a, himahleh kintaka na hih chun vang, deihkhawp nei puo’n la.

⁶Diktat lo taka hauhsakna muh chuh tuihu beimang pai leh, thihna thâng tawbang ahi.

⁷Mi nunsiete chuh amau gitlohna chun sumangthai intin, thil dik hih ding a nawp loh ziekun.

⁸Migilote lampi chuh a kâwi a, himahleh mi lungthim thiengte lampi chuh a zang hi.

⁹Numei gilo tawh In lien tak sunga chen sang chun, In chung sip zum a chen chuh a pha zawi.

¹⁰Migilote chun thil phalo hih a ut zing u a, a invengte chungah zahngaihna a nei puou hi.

¹¹Mi muhsit chîngte chuh gawt a um tieng u leh, mimawlte chun a het lawh sek u a, mi pil chuh sinsak a a um leh hetna a neih lawh sek hi.

¹²Pathien chun mi gilote In a thil um chuh a he a, amah chun mi gilote chuh sietna ah a paih tha sek hi.

¹³Kuole chagahte kiko thawm ngaihthak sak lo chuh, panpihna ngên a a kiko tieng ngaihthak sak hi puo’n a.

¹⁴A gûka thilpiek chun lungnatna a sudai a, gawlhgukna chun lungnat huoisie tak le a sudai thei hi. a.

¹⁵Thudik a vaihawmna chuh mi dikte a ding chun kipah-um ahi a, himahleh mi gilote ding chun vang lungkhamna ahi.

¹⁶Hetthiemna lampi apat vakmang chuh, mithite umkhawmna chun châwl in a.

¹⁷Kuole nawpchenna thalah chuh chagah intin, uain leh sathau ngaina mi chuh hausa ngei puo’n a.

¹⁸Mi gilote chuh mi dikte kitatna hiu intin, mi thep chîngte chuh mi diktatte kitatna hi’nau.

¹⁹Numei hansie leh phunchiek tawh chen khawm sang chun, thalek gama um a phazawi.

²⁰Mipilte In achun neihlelam a um a, himahleh mi ngawl vang chun sum a muh matiem in a mang zo zieng sek hi.

²¹Kuole nunnem na leh ginumna zuite chun hinna, diktatna leh zahngaihna chang un au.

²²Mipil chun mihatte khawpi chuh a susie a, a kingakna kulhpi chuh a suchim sek ui.

²³Kuole a kam leh a lei vengpha chun, buoina lak ah a hinna a vengbit sek hi.

²⁴Mi chapo leh kilek chuh a min musit a hi a, chapo takin thil a hih sek hi.

²⁵Mi thadah duhthusam chun amah a that sek a, a khuta nasep ding a ut loh sek ziekin.

²⁶Minunsie chun ni tum in a awtcha a, himahleh mi diktat chun a piedawk sek a, phal takin a pie sek hi.

²⁷Migilo kithawihna chuh LALPA a dingin kihdak-um ahi a, ngaihtuohna gilo taka a piek vang chuh kihdak a um zaw diek hi.

²⁸Thu hetpih lepchieh chuh mangthai in tin, himahleh a phatak a ngaithate chuh lawhting in au.

²⁹Mi gilote chuh a kihansansak sek u a, mi diktat in vang a chieh na ding a gel tûp masa sek hi.

³⁰LALPA do thei dingin pilnate, hetnate, lemguotthiemna bangmah a um puoi.

³¹Sakawlte chuh kido ni a dinga guonggalh ahiu a, himahleh zawhna vang chuh LALPA a um ahi.