Read Gangte THUCHINGTE 23 Bible Online

THUCHINGTE 23 - Gangte bible

THUCHINGTE 23

¹Vaihawmte tawh an ne khawm dinga na chutkhawm lai un, na mazawn achun banga um em phatak in ngaihtuoh in.

²Na kam alim ten vang leh, nang leh nang kisûm in.

³Lepbawlna an ahi tih hezing inla, lengpa an limna mai chuh utcha ki’n.

⁴Hauhsak utchakna mai in na sem ki’n la, nangmah hetna mai ah kinga ki’n.

⁵Thil umlo chung achun na mit hak ki’n la, hauhsakna haw chun tha a kisiem u a, muvanlai van lama leng bang in a leng mang sek hi.

⁶Mi chîpte chângthâk chuh ne ki’n la, a limna te chu le utcha ki’n.

⁷A ngaihtuoh bang tak chun ahi a um chuh, “Ne’n la dâwn in,” ti’n tin, mahleh a lungthim achun ngaihnatna a nei puoi.

⁸Na thil nek chuh lawdawk kit in na tin, kamthiem thu cheng chuh beimang ina.

⁹Mingawl het achun thu gen ki’n, na pilna thu cheng chuh musit ding ahi.

¹⁰Malai gamgi chuh chawnmang ki’n la, pa neilote lo achun le lut diek ki’n.

¹¹Amau haw Tandawkpa chuh a hât ngâl a, nang hun do in a chung thuu chuh genpih in a.

¹²Kisinsakna lam achun na lungthim chuh pie’n la, na bil chuh hetna thu lam achun.

¹³Thununna chuh naupang apat chun lamang ki’n, mawlh in zêp mahleh chun chun thi lo ding ahi ngâl a.

¹⁴Mawlh a na zêp chun, a hinna chuh Sheol apat in hukdawk ding na hi ngâl a.

¹⁵Ka chapa, na lungthim a pil phawt chun, kei lungthim le kipâk in a.

¹⁶Na mûk in thil dik a gen phawt chun, ka lungthim kipâk in a.

¹⁷Na lungthim in mi gilote awtcha ki’n la, himahleh nicheng in LALPA chuh kihcha zing in.

¹⁸Matheilo in tak achun malam kinepna a um a, na kinepna chuh sukbei in um puo’n a.

¹⁹Ka chapa ngaitha’n la chingthei in, na lampi chuh guntak in ngaihtuoh in.

²⁰Zu dâwn hatte lak leh, gawlsan taka sa nete lak achun tel ki’n.

²¹Zu heh mite leh sa heh mite chuh hung chagah ding ahiu a, nguina chun puonsie bangin hun tuom ina.

²²Na pa, nang hun hingpa thu chuh ngai inla, na nu chuh a hung upat inle musit ki’n.

²³Thudik chuh chawn la, zuok kit ki’n, Ahi, pilna te, sinsakna leh hetthiem nate le kichâwk in.

²⁴Mi diktat pa chuh nasa takin kipâk intin, chapa pil hingpa chun a chungah kipahna nei in a.

²⁵Na nu le, pa chuh kipâk takin um u hen la, nang hun hingte chuh kipâk takin um hen.

²⁶Ka chapa na lunggil ei pie’n, chun, na mit chun ka lampite hi en zui in.

²⁷Numei nawhchizuok chuh kawkhuk thuk tak tawbang ahi a. Numei zawlsai chuh kawkhuk chîp tak tawbang ahi.

²⁸Ahi, gucha bangin kuolsa’n mi a châng u a, mihingte lak achun ginum lohna a hih pung sek ui.

²⁹Kuote a chunggik sek? Kuote a lungkham sek? Kuote a kina sek? A ziek beia liemna thuok sek chuh kuote a? Kuote a mit san kieukuou sek chuh?

³⁰Zu muna chuh zing sek te, zu kihelkhawm dâwn sekte hi ahiu a puo!

³¹Zu hi a san lai tak leh, khawna a zie a lat lai a, a luon thak zawih zawih lai in en ki’n.

³²A tâwp leh gûl guolin mi a chu a, gu hattak guolin mi a chu sek hi.

³³Na mitin thil lamdang tak takte mun na tin, na lungthim a thu mantheihlo um te chuh hun gendawk inla.

³⁴Ahi, tuisuohgiet chunga ipmu tawbang hin na tin, lawng puonzak khuom lêk a kuol tawbang hin la.

³⁵“Ei zêp u a, mahleh, na ka sa puoh a, ei khen u a, mahleh ka he puoi.” “Bangtik leh ka halhdawk die aw? Dâwn beh zel ing ka,” hun ti ding na hi.