Read Gangte THUCHINGTE 26 Bible Online

THUCHINGTE 26 - Gangte bible

THUCHINGTE 26

¹Nipi laia vuk kie leh, buh-ât laia guoh a kilawm loh guolin, limbawlna chuh mingawl tawh a kilawm puoi.

²Pielpa leng viel viel leh vachawng pem hattak guolin; a ziek um lo a mi hansie lawh chuh a guitung kha puoi.

³Savun khauhuol chuh sakawl zêpna ding ahi a, kaihheina chuh sabiltung a ding ahih bangin, zêpna mawlh chuh mingawl nungzang a ding ahi.

⁴Mingawl chuh a ngawl dungzui in dâwngthuk ki’n; khutilochun amah tawbang hi khan la.

⁵Mingawl chuh a ngawl dungzui takin dâwng ah; Khutilochun miching khatto kisa khâna.

⁶Mingawl thuvaithak pa chun amah keng kitan a, a sietna dinga tui dâwn tawbang chauh ahi.

⁷Kengbaite keng a kikim puoh a, mingawl kama thupil kigen chuh zie tawbang chuh ahi.

⁸Mingawl limbawl na piek chuh; vaisuongseh a suong kanden tawbang ahi.

⁹Mingawl kama thupil kigen chuh; zukham in a khuta ling a khei guot tawbang ahi.

¹⁰Pathien lopi thil bangkim Siemtu chun mingawlte chuh pie thuk in tin, mi gilote chule dinthuk ina.

¹¹Uicha a luok lama a vaihkit guolin; mingawl chun a ngawl dân a sulang kit sek hi.

¹²Mi amah leh amah pil kisa na mu kha? zie sang chun mingawl a chun kineppih na a um zawi.

¹³Mi thadah chun, “Lampi ah sakeibaknei a um a; Kawtthêl ah sakeibaknei a um hi,” a ti sek ui.

¹⁴Kawpza-a kawtkhak a kipei viel bangin, mi thadah chuh a zâlkhun chungah a kipei viel viel sek hi.

¹⁵Mi thadah chun ankuong ah a khut a kawihden sek a; a kam vak sawk toh ding nasan a lunglah sek hi.

¹⁶Thil sutdawk thiem mi sagih sangin, mi thadah chuh amah ngaih in a pil zaw sek hi.

¹⁷Kuole a chieh kawma mi kinakna a va kikum zieng chuh, ui vakviel a bil a mat tawbang ahi.

¹⁸Kuole, a invengte zuou a thêm a, “Ka hun daihna ahi” ti chuh;

¹⁹Mibanglo khat in a meisel leh thal te leh thih theihna a mi a kap tawbang ahi.

²⁰Thingkhuoh a tum tieng leh mei a mit guolin; kihogukna um lohna achun kinakna a bei sek hi.

²¹Mei-âm chuh meihawl hihko ding leh thingkhuoh chuh mei hihko ding ahih guolin, mi hansie chuh kinakna chawktho in a pang hi.

²²Mi gensietu gensietna chuh liem-ma tawbang ahi a; zie chun sunggil lam tiengin a zel sek hi.

²³Thugen zawl thiem mûk leh lungthim gukhah chuh; leibel dangka tui luonkhum tawbang ahi.

²⁴Mi muhdah chîng chun a mûk in a selgu sek a, a lunggil chun vang a vawp sek hi.

²⁵Thu pha tak a gen in le gingcha diek ki’n, a lungthim achun thil kihdak-um sagih a selgu zing ngâl a.

²⁶A mi muhdahna chuh selgu hâmhâm mah leh; a gitlohna chuh vantâng het in kiphuong ding ahi ngâla.

²⁷Kieklutna dinga kawkhuk lai taphawt chuh, zie chun amah kielut intin, kuole, suong lik taphawt chuh amah chungah kilehkit in a.

²⁸Lei zuou thei chun amah sukliemte mah kha a mudah seka, pahchak lêmna kamsuok chun thil a hihsie sek hi.