Read Gangte THUCHINGTE 27 Bible Online

THUCHINGTE 27 - Gangte bible

THUCHINGTE 27

¹Zinglam a thil hung tung ding kisuonpih ki’n; zie ni chun bang a hun suokpih ding na he puoh ngâl a.

²Nangmah kam hilo in midang in hun pakcha henla, nangmah kam hilo in malzin te kam in hun pakcha hen.

³Suong hi a gik a, pîlnel inle gikna a nei a; himahleh, mi ngawl suklungnat chuh ziete nih sang chun a gik zawi.

⁴Lungnat hi a nunsie a, thangtawm hi sietna ahi a, himahlele itthikna tawh tehkal kham ahi puoi.

⁵A gûka lungsietna sang chun, phuong taka hilhgaihna chuh a phazawi.

⁶Guolpha’n ei sukliemna chuh na mahleh, melma châwpna vang chuh thepna ahi.

⁷Nek vah lai takin khuoizu nasan hi kihdak-um ahi a, mi gilkiel a ding chun vang thilkha cheng hile a thum hi.

⁸Mi a In apat taidawk chuh, vacha a bu apat a lengmang tawbang ahi.

⁹Sathau leh gimlim in lungthim a sukipak a, zie tawbang chun guolpha apat a lungthim tak taka lemguotpih na thupha chun lungthim a sunuom hi.

¹⁰Na guolpha leh na nu leh pa guolphate chuh hengilh ki’n, na lungzîn ni chun na inkawte zuon ki’n, suohpih gamla taka um sang chun inveng naihcha a um chuh a phazawi.

¹¹Ka chapa, ching thei inla, ka lungthim sukipak in; kei ei nielkalhte chuh ka dâwn theihna dingin.

¹²Mipil chun thil phalo a mulawka, a kiselmang sek a, himahlele mingawl chun a ngaihsak a, a thuok lawh sek hi.

¹³Hetkhâkloh te chunga mawhpuo dinga kitiempa chuh a niklepuon chuh lak sak in; malzinte dinga kitiemna a a kawih chuh hen sak ding ahi.

¹⁴Zingkal mataka tho a, ngeihtak a a invengpa vangsakna pie a kiko khum chuh, hansie buokkhum a ngaih hi’n a.

¹⁵Numei hansie chuh khawsiet ni a guoh mal châk zing tawbang ahi.

¹⁶Amahnu hih thip chuh huih hih thip tawh kibang intin, a khut a sathau chawithei tawbang hi’n a.

¹⁷Thik chuh thik mah in a tat hiem a, zie tawbang chun, mihing chuh mihing mah in a tâthiem sek hi.

¹⁸Kuole theipi kung enkawl chun a gah ne’n tin, zie tawng chun, a lawiupate vengpha chuh limbawl in um in a.

¹⁹Tui laka mel kichien taka a lat bang hin, mihing lungthim chuh a hindan ah a kilang hi.

²⁰Sheol leh sietna’n dim tik a nei kha himhim puoh a, zie tawbang chun, mihingte mit le a lung-awi ngei himhim puoi.

²¹Dangkathîk chuh bela âwm tui a sukthien ahi a, sana chuh hâltuina mei a hâl thien ahi sek a; mihing chuh pahchak a lawh u hi patep na ahi.

²²Mingawl chuh sum ah buh tawh sugawp khawm mah leh chin, a ngawlna chun pawtsan diek puo’n a.

²³Na belamte dinmun chuh het guon taimat suoh inla, na gan guolhaw chuh ngaihsak in.

²⁴Sumlepai hi kumkhuo a ding ahi puoh a; lallukhuk hin le suon chengcheng a daih zo a ahim?

²⁵Hampa chuh a beih tieng leh, hamthak a hung lang dawk a; tângsanga hampahaw chule lâkkhâwm ahiu hi.

²⁶Belam mul apat in silhlechen na siem thei a, kelchate man a pat in gam na chaw thei hi.

²⁷Na nêk kham set kelnawi um intin; na inkuon u a ding leh na suok numeite etkawl na ding hung hi’n a.