Read Gangte THUCHINGTE 29 Bible Online

THUCHINGTE 29 - Gangte bible

THUCHINGTE 29

¹Kuole, hilhgaih a um zing sa ale, a lungthim hihkhauh tei tei chuh, thakhat a suksiet in um intin; sukdamna um kit ta puo’n a.

²Mi diktat in thuneihna a chan tieng leh mipite a kipâk sek u a, mi gilo in vai a hawm phat leh mipite a lungkham sek ui.

³Kuole, pilna ngaina chun a pa a sukipak sek a; himahleh, nawhchizuok kivawppihte vang chun a sum a mawk sukmangthai sek ui.

⁴Leng in thudik a a vaihawmna chun a gam a sudet sek a; himahleh, gawlhgukna la mi chun vang a susie sek hi.

⁵A invengte pahchak lêm thawhte chun amah keng ngeia dinga lên thâng kizak ahi.

⁶Mi phalote chuh amau gitlohna thâng ah a âwk sek u a; himahleh, mi phate chun vang la a sau a a kipâk sek ui.

⁷Mi pha chun mi gimtheite hihna chuh a hetpih sek a, migilo chun vang zie chuh a hetthiem sek puoi.

⁸Mi musitte chun khawpi chuh a hâl sek u a; himahleh, mipil chun vang lungnatna a sudai sek hi.

⁹Mipil in mingawl a kinakpih chun, lungna henla, nuihsan mahleh, kichamna um diek lo ding ahi.

¹⁰Thisan suoh chîng mite chun mi diktat a mudah sek u a; mi diktatte hinna chuh a hawl sek ui.

¹¹Mingawl chun a lungnat thu chengcheng a gendawk sek a, himahleh, mipil chun vang a îm sek a, a sudai sek hi.

¹²Vaihawmpa chun thu diklo a ngaihthak chun; a siehmangte chengcheng a sugilo sek hi.

¹³Mi chagahte leh a sugimtheite chuh a um khawm u a, LALPA’n a mit uh a sukvak sak gêl gêl hi ahi.

¹⁴Leng in mi gimthei diktat taka a vaihawm sak chun, a lalchutphah chuh kumlekhuo a sukdet hi’n a.

¹⁵Mawlh leh hilhgaihna’n a hihpil a; himahleh, naupang thahthawt chun a nu zahchâkna a siem sek hi.

¹⁶Migilo in vai a hawm tieng gitlohna a pung a; himahleh, mi diktat chun a puksietnau chuh muna.

¹⁷Na chapa chuh thunun inla, tichun, chawlhdamna hun pien a, ahi, na lungthim kipahna hun pien a.

¹⁸Kilâkna umlohna achun mipite a beimang sek u a; himahleh, dân zawpte vang chuh vangsak in a um sek ui.

¹⁹Suok chuh kam mai in a thunun theih puoi, he mahlele a khawksak loh ziekin.

²⁰Ngaihtuoh masa se lo a thu gen zul zul zieng na mu kha? Zie tawbang mite sang chun mi ngawl ah kinepna a um zawi.

²¹Suok a naupan lai apat a phatak a etkawl a um chuh; a tâwp leh go luoh in hung pang in a.

²²Mi lungchawm chun kinakna a châwk dawk a, mi lungpheng chun sukkhelh a hau sek hi.

²³Chapona chun mi a suniem a, himahleh kingainiem te chun limbawlna mu’n au.

²⁴Kuole, gucha kivawppih chuh amah hinna ngêi deihlo ahi a; mi hansiet khumna aw a za a, mahleh bangmah a gen ngam puoi.

²⁵Mihingte lauhna hi thâng tawbang ahi a, himahleh, LALPA a ginna ngate vang chuh bit in au.

²⁶Mi tam takin vaihawmte deihsakna chuh a hawl sek u a; himahleh, mihingte chun LALPA apat thudik a muu hi.

²⁷Mi diktatlo chuh mi diktatte ngaih in kihdak-um ahi a; himahleh, dik taka hih chuh migilote ngaih in kihdak-um ahi.