Read Gangte THUCHINGTE 3 Bible Online

THUCHINGTE 3 - Gangte bible

THUCHINGTE 3

¹Ka chapa, ka hun thuhilhte hi hengilh ki’n la, ka thupiek haw hi na lungthim in vawp zing hen:

²Na damsung ni leh kumte chuh hun behlap sak intin, thamuonna hun piek behlap ding ahi.

³Lungsietna leh thudik chun hun nungsawn kihen la, na ngâwng ah zem zingin. Na lungthim pêk chung achun zikin.

⁴Khutichun mihing leh Pathien mitmuh ah, minphatna leh deihsakna chang inla.

⁵Na lunggil cheng chengin LALPA chuh gingcha’n la, nangmah hetna mai achun kinga ki’n.

⁶Na lampi cheng chuh amah hetsak inla, chun, A ma’n na lampi ding hun hêi zan sak in a.

⁷Nang mitmuh in ching kisa ki’n la, LALPA chuh kihcha’n la, gitlohna taihsan in.

⁸Na taksa a dingin hiselna hi’n tin, na guh a dingin le hatna thak hi’n a.

⁹Na thil neih te chun LALPA chuh limbawl inla, na gah masa te chengcheng chun tawh.

¹⁰Khutichun na buh In te chuh nasa taka sukdim in um intin, na grep khuk chuh uain thak in luong let in a.

¹¹Ka chapa, LALPA thununna chuh ngaidau ki’n la, a hilhgaihna chuh ngaidau diek ki’n.

¹²LALPA chun a hehpih tâk chuh a hilhgaih sek a, pa’n chapa a hehpihte a hilhgaih sek bangin.

¹³Chitna mudawk mi chuh a kipâk a, hetthiemna nei mi chuh a kipâk sek hi.

¹⁴Zie chuh dangkaguo a lawkna sangin a phazaw a, sana sangin apha zawi.

¹⁵Suongmantam sangin a lul zaw a, duhthusam theih thil cheng tawh le tehkal theih ahi puoi.

¹⁶A khut changlam achun damsawtna a um a, a khut veilam achun hauhsakna leh zahumna a um hi.

¹⁷A lampite chuh nawpsakna lampi ahi a, a lampi chengcheng chuh thamuonna ahi.

¹⁸Amah tudet te ding chun hinna thingkung a hi a, Amah kivawppih zingte chuh a kipâk ui.

¹⁹LALPA chun chitna’n lei hi a mudawk a, hetna’n vante hi a phuhdawk ahi ngâl a.

²⁰A chitna chun luipi tui chuh a luong dawka, meipi te chun dâitui a kiek sak sek ui.

²¹Ka chapa, chitna leh hettheihna chîm tak chuh na mitmuh ah chiehmang sak ki’n la, pilna leh hetthiemna chuh vawp zing in.

²²Khutichun na thagau a dingin hinna hi’n tin, na ngâwng a ding in khivui hi’n a.

²³Tichun, na lampi achun bit takin chieh in na tin, na keng le kipal kha ta puo’n a.

²⁴Na chut tieng leh lau ta puo’n na tin; na kuol phat lele nuom takin ipmu ta’n la.

²⁵Mi gilote chunga sietna hungtung phut guola, na chunga hung tung ding chuh lau ta puo’n la.

²⁶LALPA chuh na kimuonpih pên hi’n tin; na kalsuon sukawi ding chuh veng ding a hi ngâl a.

²⁷Na khuta thilpha hih theihna na neih lai chan, Midang te a ding a thilpha hih kidâm ki’n.

²⁸Na neih pet ahih phawt chun, na invengte kawm achun, “Chieh inla, zing leh hung kit ah,” ti ki’n.

²⁹Na invengte, nang hun muong mah mah te a ding chun; thil phalo ngaihtuoh ki’n.

³⁰Nanga dinga pawi a khawih loh chun, a ziek beiin mi kilanpih ki’n.

³¹Thagum suohte chuh awtcha ki’n la, A lampiu chuh khatchale zui ki’n.

³²Zuou gen hi LALPA ngaih chun thil kihdak-um ahi a, himahleh, a thuguk chuh mi diktatte kawm achun a kawih sek hi.

³³Mi nunsiete In achun LALPA hansie chuh a um a; himahleh, mi diktatte chênna chuh a vangsak sek hi.

³⁴Muhsit chîngte chuh a musit sek a, himahleh, kingainiemte chuh zahngaihna a pie sek hi.

³⁵Miching chuh zahna chang intin, himahleh, mingawl luhlulte chun zahchâkna chang un au.