Read Gangte THUGENPA 2 Bible Online

THUGENPA 2 - Gangte bible

THUGENPA 2

¹Ka lungthim chun, “Keimah leh keimah kisulawp ing ka ting; kipahna hi bang tawbang tak ahim tih muhdawk guo’ng ka,” ka ti a, ahi, ngaitie, zie chule bangmahlo mai ahi tih ka mudawk tai.

²Nuih hat hi ngawlna ahi tih le ka mu dawk a, tawbang nawpna chuh phatchuomna bei ahi tih ka he tai.

³Pilna ka ngaihnat pên achu puih a um in, keimah leh keimah uain a kisukkipak guon, hun nuom taka mat ka guo a, zie chuh mihing chapate’n a damsung hun uh chawmcha sung a mat hawih theih pên uh hi dingin ka ngaihtuoh a.

⁴Na lopitak ka sem a, in hawih tak ka kisak a, grep huonte ka siem a.

⁵Huon leh pakcha huonte ka kisiem a; zie a chun theikung chitin ka phut a;

⁶Tui a chawmna dingin tuilam leh dîl te ka bawl a.

⁷Suok numei leh pasal ka kichâwk a, ka In a pieng den suok le a um u a. Jerusalem a a na cheng masate cheng neih sanga tamzaw ganguol haw a lien a neu le ka nei a.

⁸Ka gamsung a vaihawmte go khawlkhawmna a pat in sumeng leh sana ka lakhawm a; Ei sukipak dingin numei leh pasal lasa thiem ten la a sau a, taksa nawpsakna dingin mei tampi le ka nei a.

⁹Khutichun ka hung lopi mah mah ta a, ka masanga Jerusalem a chêngte chuh ka khel veka, ka pilna le ka kawmah a um zing a.

¹⁰Ka deih taphawt ka nei a, ka mitin a etnawp taphawt kisûm lo in ka en a, ka lungthim in nuom a sak phawt chuh kitim lo in ka bawla; ziehi ka nasepna cheng chunga ka kipahman chuh ahi.

¹¹Tichun, ka khutsuok chengcheng leh, ka sepgimna a ka thilhih chengcheng ka ngaihtuoh a, thil chengcheng hi bangmahlo leh thâwn mai ahi. Bangmahlo, huih delh tawbang phet ahi, Ni nuoia hin thil phachuom a um puoi.

¹²Khutichun ka kipana pilna hileh ngawlna hileh bang tawbang ahim tih chuh ka hun ngaihtuoh pan ta a.Lengte chun a masang u a lengte thilhih sa haw chuh a hih thei chauh u a.

¹³E khai! “Pilna chuh ngawlna sangin a phazawi, vak chuh thim sangin a pha zawi tih ka mudawk a.

¹⁴Mi pil chun a chiehna ding a mu thei a, mi ngawlin vang a mu thei puoi. Tichun, I bawn u a chungah thil kibang tung chiet ding ahi,” tih ka hun he ta a.

¹⁵Ka lungthim chun, “Mingawl chunga tung mah chuh kei chunga le tung ding ahi,” tih ka ngaihtuoh a. Khutichu ahih leh bang zieka ching kisa taluo ding ka him?

¹⁶Mipil le mingawl le kumlekhuo a hetzingna a um diek puoi. Hun hung tung ding achun I bawn un hetngilh hi ding I hiu hi. Mi ngawl guola mipilte le thi vek ding I hi ngâl u a. Bangti a mipil chuh mingawl guola thi mai ding ahim?

¹⁷Zieziekchun, hinkhuo hi ka haw a, a ziek chuh ni nuoia thil kibawl hih keia dingin lungkham um ahi a; thil chengcheng hih bangmahlo mai ahi.

¹⁸Ahi, ni nuoia ka sepgimna chengcheng hih ka haw a, ka nunga hung dingte kawma chuh nusieh tei ding ka hih ziekin.

¹⁹Amah chuh mi pil ahih mi ngawl ahih kuo a he ta ding? Gimthei taka ka sep dawk cheng leh ni nuoia pilna manga ka sep gah cheng chunga chun amân thu hun nei ding ahi ngâl a. Zie chule bangmahlo mai ahi.

²⁰Khutichun, gimthei taka ka nasepnate ziek chun ka kisik hi.

²¹Pilna leh hetna leh thiemna manga semgimpa chun, sem lo hielte go dinga chuh a nutsieh sak ding ahi. Zie hile bangmahlo leh thil diklo tak ahi.

²²Ni nuoia a sepgimna cheng leh, lunggil châwl taka a sepna ziek chun mihing in banga a muh?

²³A damsung hun chengcheng u chuh nat thawkna ahi a, a nasepte chu le lunggimna ngên cha ahi ngâl a. Zan lele a lungthim a chawldam diek puoi. Zie chule bangmahlo mai ahi.

²⁴Mihing a ding chun nek leh dâwn a, a sepgim zieka thilpha a nawpchen sanga phazaw a um puoi. Zie chule Pathien khuta kipan ahi tih ka hun he tai.

²⁵Amah lo in kuo a nek ding mu a nawpsakna nei thei ding?

²⁶Pathien in amah sulungkimte kawma chun pilnate, hetnate, kipahnate a pie ngâl a; migilote chun vang, Pathien sulungkimte kawma piek dingin a khawlkhawm hâm zawu hi. Zie chule bangmahlo leh huih delh tawbang ahi.