Read Gangte THUGENPA 3 Bible Online

THUGENPA 3 - Gangte bible

THUGENPA 3

¹Thil bangkim a ding in hunbi a um a, zie khawvel a thil hung um chengcheng hi Pathien in a guot bang zela hung um ahi.

²Pien hun a um a, thih hun a um, Thil phuh hun a um a, bawhdawk hun a um,

³Suklup hun a um a, sukdam hun a um, phiet hun a um a, sakkit hun a um a,

⁴Kah hun a um a, nuih hun a um, lusûn hun a um a, lam hun a um hi,

⁵Suong thehzak hun a um a, suong luokkhawm hun a um, theh zak hun a um, kipawm hun a um a, kipawm loh hun a um,

⁶Muhdawk hun a um a, mansak hun a um, vawp phat hun a um a, paihmang hun a um,

⁷Bawhthek hun a um a, khuih phat hun a um, thip hun a um a, pau hun a um,

⁸Hehpih hun a um a, muhdah hun a um, kido hun a um a, kicham hun a um hi.

⁹Nasempa chun a sepgimna apat hin banga a muh?

¹⁰Pathien in buoipih ding I chung u a ei kawih khum hi ka mu a.

¹¹Bangkim hi a hun tawh kituok dingin a siem a. Mihing lunggil achun kumsawt a kawiha, het nawpna a um a, himahleh Pathien in a tunga pata a tâwp tienga dinga a thilhih chuh a mudawk diek puou.

¹²Amau a ding chun kipâk taka um a, damsunga nuom taka a um khel u a phazaw bangmah ka he puoi.

¹³Zieziekchun, mitin hi ne leh dâwn a, a sepgim gahteu nuom taka a chen u chuh Pathien thilpiek ahi.

¹⁴Pathien thilhih taphawt chuh kumsawt daih ahi tih ka he a. Bangmah na behlap thei puoh a, na lamang thei diek puoi. Pathien in a thilhih hi amah I kihchâk theihna ding uh ahi.

¹⁵Thil umte hi a na umsa kha ahi a thil hung um dingte le a na umsa mah kha ahi. Pathien in a chieh mangsa haw kha a hun um sak kit zel ahi.

¹⁶Zielo chun le, ni nuoia diktatloh na muna nunsietna um leh, dikna muna diktatlohna um chuh ka mu a.

¹⁷Ka lungthim chun, “Pathien in mi dik leh mi nunsiete chungah vaihawm intin, thil cheng chenga ding leh, nasep tin cheng dingin hun a um ngâl a,” ka ti a.

¹⁸Mihing te hi gamsa tawbang phet ahiu hi tih a kihetna dingun Pathien in ei patep ahi, ka lungthim in ka ti a.

¹⁹Mihingte chung leh, gamsate chunga thil tung chuh kibang ahiu a. Mihing a thi a gamsa le a thi a. Hinna hu kibang a nei u a, mihing inle phatchuomna a nei diek puoi, Thil chengcheng hi bangmahlo mai ahi ngâl a.

²⁰Mun khat ah chieh khawm chiet untin, leivui a kipan ahiu a, leivui mah a chuh vaikit ding ahiu.

²¹Mihingte thagau chuh chunglam ah a chieh a, ganhingte thagau chuh nuoilam a lei lam ah a chieh suk hi tih kuo a he?

²²Zieziekchun mihingte hi a nasep u a kipâk taka a um sang u a phazaw bang mah a um puoi tih ka mu a, zie chuh a chanvo uh ahi ngâla. A nung u a thil um dingte kuo a muh sak thei ding?