Read Gangte THUGENPA 9 Bible Online

THUGENPA 9 - Gangte bible

THUGENPA 9

¹Zie thil haw hile ka ngaihtuoh a; abawn in ka enchien a, mi pil leh mi diktatte thilhih haw chuh bangti dana Pathien khuta kinga ahim tih ka ngaihtuoh a, lungsietna hi henla, muhdahna hileh a masang u a thil hung um ding kuoma’n a he puoh ngâl u a.

²Lamdanna a um diek puoh a; mi diktat leh migilote, mi pha leh mi sie te Pathien ngaihsak leh ngaihsak lote, kithawihna bawl leh bawllo te chungah tâwp na kibang a tung chiet ngâl a. Mi phate chunga tung chuh mi gilote chung ale a tung tho a, kipautiemna neite le kipautiem lote sangin a phazaw diek puou hi.

³Ni nuoia thiltung lak ah zie hile thil phalo mah mah khat chuh ahi; mitin chunga kibang chieta thil a tun hi. Zie mai chuh hilo in mi cheng cheng te ngaihtuohna chuh ngawlna a dim ahi a, zie nung chuleh mithite kawmah a chieh sek ui.

⁴Himahleh, mihing chuh a hinna a um sung chun kinepna a um a; sakeibaknei thi sangin uicha hing chuh a phazawi.

⁵Ahi, mihing chun thi tei ding ahi tih a kihe a, himahleh, mithi chun bangmah a he puoh a. Kipahman muh ding le a nei diek ta puou a; hetzing le ahi diek ta puou hi.

⁶A mi lungsiet theihnateu, muhdahna te, a utchaknateu chuh a bei vek ta a. Ni nuoia thil hung umte laka hin chanmun bangmah a nei ta puou hi.

⁷Khawsa zel inla, kipâk takin na chângthâk ne’n la, uain dâwn in; na thilhih chengcheng chuh masang lai apat a khah Pathien in pha a sak sa ahi.

⁸Kipahmel pu zing inla, na luchang chuh thau nuh ding tasam kihen.

⁹Pathien in a hun piek na hinkhuo bangmahlo mai sung ahin na lungsiet na zi tawh kipâk takin hinkhuo mang in. Zie chuh ni nuoia na sepgim gah ahi a, damsung a na chanvo ahi.

¹⁰Na khut in sep ding a neih taphawt chuh theihtawp in sem in; na chiehna ding than achun nasep ding ahim, ngaihtuoh ding ahim hetna ahim, pilna ahim um talo ding ahi ngâl a.

¹¹Ka kihei a, ni nuoia thil dang khat ka muhdawk kit chuh, khawvel a kitaihsiekna chuh mi chan-gang te a ding chauh ahi puoh a, kidona chule mi hangsante chauh a ding ahi puoh a, chângthâk chule mipilte chauh a ding ahi puoh a, hetthiemna neite a hausa chuom diek puou a, chuleh, deihsakna hi mithiemte a ding chauh ahi diek puoi, himahleh, ahun leh hun lemchâng kibang chieta amau kawma hungtung ahi.

¹²Chun, kuoma’n a chung a sietna hung tung ding chuh a he masa thei puoh a, len a nga âwk bang leh thâng a vacha âwk bangin mihingte chung ale siet na a hungtung phut sek hi.

¹³Khawvela hin pilna hi bang tienga mi’n ngaihsak ahim tih etsakna khat le ka mu dawk a, thupi ka sa mah mah a,

¹⁴Khawpi neucha mi tam lo cha umna hi a um a. Zie chuh, leng thilhih thei tak khat hin a va buluh ta a. A huol kimvel a, a bângte chuh susie dingin a kiguo ta a.

¹⁵Zie khawpi sung achun mi chagah tak khat a um a, amah pilna chun zie khawpi chuh a hukdawk in a um a. Himahleh, kuoma’n zie mi chagah pa chuh a hezing ta puou hi.

¹⁶Mi chagahte pilna chuh muhsit a um in, a thuu le ngaihsak loh in um mahleh, kei chun chuh, “Hatna sangin pilna a phazawi,” ka ti zing hi.

¹⁷Mipil in awlcha a thu a gen chuh, mi ngawlte laka vaihawmpa kiko pum pum sanga chuh ngaihsak zawk ding ahi.

¹⁸Pilna chuh kidona gâlvante sangin apha zaw a; himahleh, migilo khat inle thilpha tamtak a hihsie thei hi.