Read Gangte SOLOMON LA 2 Bible Online

SOLOMON LA 2 - Gangte bible

SOLOMON LA 2

¹Sharon phaizawl lili leh rose pak ka hi a,

²ling laka lili pak bang ahi, ka lungsiet chuh nungak dangte lak achun.

³Gammâng thing laka apple thing bang ahi; ka deihtak chuh tangvalte lak achun, a lima chun kipâk takin ka chu a, gahte chuh kei din a thum ngêi mai.

⁴Ka chunga puonzak chuh hehpihna puonzak ahi a, guolvakna In achun ei pui a.

⁵Grep thei bel in ei suhing unla, apple thei in ei suhalh tiem u, hehpihna a damlo ka hi ngâl a.

⁶Aw a khut veilam chuh ei khapsak henla, a khut changlam in ei pawm leh aw!

⁷Ka hun ngên hi, aw Jerusalem chanute haw, phul a sasan leh gam sazukpi ten, ka hehpih chuh subuoi kiu inla, phawng kiu in, amah a lung-awih macheng in.

⁸Ka deihtak aw chuh ka za a, ngaiin, a hung hi tânghaw chunga hung kithawh in, muol haw chungah a kichiem hi.

⁹Ka deihtak chuh, sasan ahim, zuktuoi dâwng lai a bang hi; ngaitie, ka kulhbang nung ah a ding zing hi, tukvan haw a khan a hung dâk hi, vathangkalh âwng ah a kilang hi.

¹⁰Ka deihtak chun ka kawmah a gena, Tho inla, ka hehpih, ka et chim loh, hung pawtdawk tang uo!

¹¹Entie, phalbi a bei ta a, guohtui le a hul ta a;

¹²Lei chungah pakchate a hung kilang a, vachate hâm hun a hungtung ta a, I gam uh ahin vakhu hâm zak ahi tai;

¹³Theipi kung in gah a suoh ta a, grep guite a hung paklun, a gimlimnau chuh a suohdawk un, tho inla ka hehpih, ka et chim loh, hung pawtdawk tie.

¹⁴Aw ka va khu, suongpi kek kal a, kâwllêk dan kal a um, na mel ei muhsak inla, na aw ei zak sak ta; Na aw a hawih a, na mel lah a ngaihkai ngâl a.

¹⁵Si-âlte ei matsak unla, si-âl note, grep huon susie sek te chuh, I grep huonte hung paklun ding ahi ngâl a, ti’n.

¹⁶Ka deihtak chuh keia ahi a, chun, kei le amah a ka hi a, lili pak lak ah a ganguol a tat sak sek hi.

¹⁷Nisa a nem maa, lîm a kihei macheng in, hung in, ka deihtak, Bethar tâng a sasan, sazuktuoi bang hung hi’n.