Read Gangte SOLOMON LA 3 Bible Online

SOLOMON LA 3 - Gangte bible

SOLOMON LA 3

¹Zan in zâlkhun chungah ka ngaihtuoh sek, ka hehpih chuh ka hawl viela, mahleh ka mu zo puoi,

²Tho ing ka ting, khawpi kawtthêl haw achun vakviel ing ka ting, hawl zel ing ka, ka tha’n a hehpih chuh: ka hawl viela, mahleh ka mu zo puoi; ka sama, mahleh ei dâwng puoi.

³Khawpi venga chieh vielte’n ei muu a, a kawm u ah ka tha’n a hehpih chuh na muu em ka ti a.

⁴Amau haw ka pelh nungcha chun, ka mu tai, ka tha’n a hehpih chuh; ka tu ta a, chiehsak kit ta hiel puo’ng ka, ka nu ina, kei ei vawpnu indan sung ah, amah ka puihlut macheng in,

⁵Ka hun ngên hi, aw nanguh Jerusalem chanute haw, ka hehpih chuh a lungkim masieh gamlaka sasan te leh sazukchal ten phâwng kiu in; amah a nawp macheng in.

⁶Meikhu ding banga gamthip a pata hung pawt a, sumkawlveite gimlim tin cheng leh murra leh begaw gimlim nam vengvung khu kuo ahi?

⁷Ngaitie, Solomon zâlkhun khuh, gâlhât sawmgup in a din huol ui, Israel gâlhât laka mite chun,

⁸A bawn un chemzâm a kivawp ui, kido thiem mi ahiu; mitin in chemzâm a vawp ui, a khelpi chungu ah, zan a mang lauh-um ziekin.

⁹Leng Solomon in kizawnna talai a kisiem a, Lebanon tânga thing in;

¹⁰A khuom chuh dangkaguo’n a siem a, a kingaihna chuh sana’n, a chutna chuh puonsandup in; a sunglam chuh a lem ui deihum takin, Jerusalem chanute chun.

¹¹Chiehdawk unla, aw Zion chanute, leng Solomon chuh en un; a khuksak kha, a nu’n lenglukhuk, a zi neih ni a, a lunggil kipahna ni chun.