Read Gangte SOLOMON LA 4 Bible Online

SOLOMON LA 4 - Gangte bible

SOLOMON LA 4

¹Moneipa’n mo a Pahchakna Ngaitie, na hawih hi, ka hehpih, ngaitie, na hawih hi; na mitte chuh vakhu mit a bang hi, na mai khuhna nuoia chun, na sam chuh kel hawn lak abang hi, Gilead tâng panga taisuk haw chuh!

²Na hate chuh belampi mul met zawh tûng, sil zawh tung bang chuh ahi; a bawn un kawppih a nei chiet uh a, a lak u ah khatchale a chang um a um puou.

³Na mûk te chuh pat sandup a bang hi, na kam chuh a deihum na mai zên e, na biengte chuh na maikhuhna nuoi achun vaimimthei phel a bang ui.

⁴Na ngâwng chuh David kulhsang a bang hi, gâlvan kawihna a siem chi; phaw sangkhat a kikhai hi, zie taka chun, gâl hatte phaw haw ngêi chuh.

⁵Na ângte nih hih sasan no kiphik lili pak laka ta a bang hi.

⁶Lim ahung bei a, zingkal ni no suoh macheng in, murra tâng leh begaw muol achun um zing ing ka.

⁷Na hawih bukim na e, hehpih, nangmah achun demna ding a um puoi.

⁸Lebanon apat in hung in, ka guolnu, ka kawmah, Lebanon apat in ka kawmah; Amana tângsip apat chun vak en inla Senir leh Hermon tângsipa pat chun, Sakeibaknei kul apat in, keitehaw tâng apat te’n le.

⁹Ka lunggil na zo tai, ka suohpihnu, ka lawinu, ka lunggil na zo tai, khatvei nei mitsik-ât in, na ngâwng a sana khibah khat chu tawh.

¹⁰A hawih na e, na hehpihna, ka suohpihnu, ka lawinu; uain sangin na hehpihna chuh bang tawbanga phazaw ahi tam! Gimlim chengcheng sangin a lim zawi na sathau gim.

¹¹Aw ka lawinu, na mûk ah khuoipi zu a vai: Na kamsuok ah khuoizu leh bâwngnawi a um; na silhlechen gim chuh Lebanon gim a bang hi.

¹²Huon khak a um chuh ahi, ka suohpihnu ka lawinu chuh, tuinak khak a um tuikhuk khak a um chuh.

¹³Vaimimthei mûm bang ahi na deihum zie, gah phapen pên pawt sekte,

¹⁴Henna leh spiknard te, spiknard leh safron te, kawl chuh gimlim leh thingguithak, begaw thing chitin cheng te, murra leh aloe, gimlim chi tin cheng te tawh.

¹⁵Nang chuh huon tuikhuk, tui laihdawk hing chuh na hi. Lebanon tâng apat luicha hung luong tawbang chuh na hi.

¹⁶Tho inla, aw mâl huih, hung nung in, Aw sim huih, ka huon hi hung mût inla, a gimlim a hung lendawk theih na dingin; ka deihtak chuh a huon ah hung lut hen la, a gah phapen pente chuh ne hen.